Presidenti i Shteteve të Bashkuara të Amerikës (ShBA), Donald Trump duke e shfaqur një tablo të errët në lidhje me Korenë e Veriut, udhëheqjes së Phenianit i dërgoi mesazh duke thënë se “ShBA-ja nuk duhet nënçmuar dhe sprovuar”.
Gjatë kontakteve në kryeqytetin Seul të Koresë së Jugut, që është ndalesa e dytë në kuadër të turneut të vizitave në vendet e Azisë, Presidenti Trump mbajti një fjalim në Kuvendin Kombëtar të këtij vendi.
Duke ju drejtuar ligjvënësve në një fjalim në Kuvendin Kombëtar të Koresë së Jugut, Trump këmbënguli se regjimi Kim duhet së pari të çarmatoset dhe të ndalojë me sjellje provokuese.
Trump shfaqi një tablo të errët në lidhje me Korenë e Veriut të udhëhequr nga lideri Kim Jong-un, ku tha se “Ata janë në një gjendje aq të zymtë, sa që edhe nëpunësit e qeverisë janë të gatshëm të largohen nga vendi dhe të punojnë si skllevër jashtë shtetit”.
“Ata më shumë preferojnë të jenë skllevër se të jetojnë në Korenë e Veriut”, bëri të ditur Trump, ndërsa këtë vend e cilësoi si “një ferr të cilin nuk e meriton askush”.
Donald Trump gjithashtu tha se “Populli koreanoverior po vdes nga uria”, ndërsa për udhëheqjen e Kimit bëri fjalë si për diktaturë mizore.
Presidenti i ShBA-së udhëheqjen e Phenianit e akuzoi për shkelje të të drejtave dhe korrupsion dhe se ajo kërkon paqe në gadishullin korean me anë të forcës.
Ndërkaq Trump testimet bërthamore dhe balistike të Phenianit i vlerësoi duke thënë se “Regjimi i Kimit kërkon konflikt me vende tjera për të shpërndarë shqetësimet e përgjithshme brenda vendit”, ndërsa Koresë së Veriut i bëri thirrje duke thënë se “Mos na nënçmoni dhe mos na sprovoni”.
“Suksesi i Koresë Jugore do të jetë mënyra më e qëndrueshme për të diskredituar fantazinë e errët të regjimit të Kimit. Rreziku rritet çdo ditë e më shumë për sa kohë që ne presim, ndërsa opsionet për zgjidhje po zvogëlohen”, bëri të ditur Trump, shkruan TRT.
Donald Trump, i cili është Presidenti i parë i ShBA-së që organizoi një vizitë zyrtare në Korenë e Jugut gjatë 25 viteve të fundit, programin e tij e filloi me vizitën në Kemp Hampshri (Camp Humpshrey), bazën më të madhe ushtarake të ShBA-së jashtë vendit, ndërsa më pas u takua me liderin e Koresë së Jugut, Moon Jae-in me të cilin biseduan në lidhje me çështjen e Koresë së Veriut dhe të tregtisë mes dy vendeve.
