Presidenti amerikan, Donald Trump, ka paralajmëruar se do të nënshkruajë një urdhër ekzekutiv për të pezulluar përkohësisht emigrimin në SHBA, për shkak të situatës nga COVID-19. Me anë të një postimi në Twitter, Trump përmendi “sulmin e armikut të padukshëm”, dhe nevojën për të mbrojtur vendet e punës për amerikanët.
Aktualisht, ende nuk ka informacione se cilat programe mund të preken, dhe nëse presidenti do të jetë në gjendje ta ekzekutojë këtë urdhër. Nga ana tjetër, ai ka hasur në kritika të shumta, pas këtij paralajmërimi, pasi kundërshtarët shprehen se po përdoret pandemia për të goditur emigracionin.
“Në dritën e sulmit ndaj armikut të padukshëm, si dhe nga nevoja për të mbrojtur punët e qytetarëve tanë të mëdhenj amerikanë, unë do të nënshkruaj një urdhër ekzekutiv, për të pezulluar përkohësisht emigracionin në Shtetet e Bashkuara!”, ka qenë njoftimi i Trump-it.
Situata është alarmante në Shtetet e Bashkuara të Amerikës. Numri i të vdekurve e po kështu dhe të infektuarve nuk po njeh trend në rënie. Deri tani numërohen mbi 40 mijë viktima dhe numri të prekurve është rreth 800 mijë.
Njoftimi i Trump-it erdhi pasi Shtëpia e Bardhë tha se më e keqja e pandemisë ka kaluar, dhe se SHBA-ja mund të nisë të rihapë ekonominë.
