Presidenti në largim i SHBA-ve, Donald Trump ka mbajtur fjalën e lamtumirës këtë të mërkurë teksa ka lënë Shtëpinë e Bardhë për t’u nisur drejt Floridas.
Trump dhe zonja e parë Melania, u larguan disa orë përpara se në Uashington DC të nisë inagurimi i presidentit të zgjedhur Joe Biden.
Ai përmendi të gjitha reformat e ndërmarra nga qeveria e tij, edhe pse kaluan një periudhë pandemie. Ndër të tjera, Trump u shpreh me ironi se shpreson që administrata e re nuk do ua rrisë taksat qytetarëve amerikanë.
Donald Trump: “Bëmë uljen më të madhe të taksave në histori. Shpresoj të mos ua rrisin tasksat, por nëse e bëjnë, ua kam thënë! E gjithë bota u godit nga pandemia e megjithatë u ngritëm. E ndërtuam dyfish. Do të shihni numra pozitivë, nëse gjërat lihen siç janë. Na kujtoni nëse i shihni këto elementë pozitivë të ekonomisë. Kemi vendin më të mirë dhe ekonominë më të mirë në botë. Bëmë diçka që konsiderohet një mrekulli, ajo ishte vaksina. Do të duheshin shumë vite, por e bëmë në një vit.
I lamë të gjitha në fushë, nuk kemi pse të themi “nëse do të punonim edhe pak më fort”, nuk mund të punosh më fort se kaq. Jeni të mrekullueshëm. Është nderi im dhe privilegji të kem qënë presidenti tuaj. Do të luftoj gjithmonë për ju, do të dëgjoj, do të shikoj. I uroj administratës së re fat dhe sukses. Besoj se do të kenë sukses, i kanë tashmë themelet për këtë. Ju duam, do të kthehemi sërish në ndonjë formë. Ju duam, do të kthehemi sërish në ndonjë formë. Faleminderit!”
Gjithashtu edhe Zonja e Parë, Melania Trump foli në ceremoninë e lamtumirës së Presidentit Trump.
Melania Trump: “Të qenurit Zonja juaj e Parë ishte nderi im më i madh. Faleminderit për dashurinë dhe mbështetjen tuaj. Ju do të jeni në mendimet dhe lutjet e mia. Zoti ju bekoftë të gjithëve. Zoti i bekoftë familjet tuaja. Dhe Zoti e bekoftë këtë komb të bukur. Faleminderit”.
