SETH J. FRANTZMAN
Turqia së shpejti do të ecë përpara me operacionin e saj të planifikuar për një kohë të gjatë për të krijuar atë që e quan “zonë të sigurt” në veri të Sirisë – dhe forcat e SHBA nuk do të mbështesin dhe nuk do të përfshihen në të, njoftoi sekretari i shtypit i Shtëpisë së Bardhë të hënën herët në mëngjes. Lëvizja është një përmbysje e jashtëzakonshme e politikës amerikane që i bën aleatët e Amerikës të vrasin mendjen nëse mund të mbështeten akoma tek administrata Trump.
Deklarata erdhi pasi Presidenti turk Tajip Erdogan dhe Presidenti i SHBA-ve Donald Trump diskutuan në një telefonatë planet e Turqisë për krijimin e një “zone të sigurt” në lindje të lumit Eufrat në Siri. Për katër vjet, SHBA dhe kryesisht luftëtarët kurdë kanë luftuar dhe mposhtur Shtetin Islamik në veri-lindje të Sirisë.
Vendimi i Shtëpisë së Bardhë do të zhvendosë në mënyrë efektive forcat partnere me të cilat kanë punuar SHBA-të. Për më shumë se një vit e gjysmë, Trump ka kërkuar të largohet nga Siria. Në mes të krizës së fajësimit (impeachment), ai tani ka marrë vendimin të sakrifikojë aleatët amerikanë në luftën kundër ISIS në vend që të bënte presion ndaj Ankarasë me mjete diplomatike.
Shtëpia e Bardhë e sheh pamjen e përgjithshme në Sirinë lindore, jo si ajo në të cilën SHBA-të luftuan dhe sakrifikuan përkrah forcave partnere kurde, por si një çështje të thjeshtë transaksionare./The Jerusalem Post
