Nga Alexei Bayer “The Globalist”
Në shumë aspekte, Berlini është një monument i madhështisë amerikane. Pas Luftës së Dytë Botërore, ishin amerikanët ata që besonin se Gjermania mund të ringrihej si një vend i lirë dhe paqësor, dhe ata ishin të vendosur të garantonin që kjo të ndodhte.
Sot, kryeqyteti gjerman është një metropol i bukur, ndërkombëtar, i gjallë, pikërisht për shkak të përpjekjeve amerikane. Në Berlin, falë Mikhail Gorbaçov dhe Xhorxh.H.W.Bush, lindi prej ribashkimit të Gjermanisë, një industri e tërë turistike e Murit. Foto të shumta bardh e zi, janë vendosur në qendër të qytetit, ku amerikanët cilësohej si heronj.
Një nga fotot e veçanta është e Xhon F.Kenedit, që në qershorin e vitit 1963, zhvilloi një vizitë të rëndësishme në Berlin, e cila rezonon ende në kujtesën kolektive të qytetit. Ai ishte momenti kur mbajti fjalimin e tij të famshëm “Ich bin ein Berliner” (Unë jam sot një berlinez).
Amerikanët e mbrojtën Berlinin Perëndimor dhe popullin e tij, si dhe u dhanë shpresa berlinezo-lindorëve se pavarësisht represionit me të cilën po përballeshin, një ditë do të ishin të lirë. Dhe sigurisht, stacionet e “trenit të lirisë”, përfshinë Urën Ajrore të Berlinit në vitin 1948 dhe fjalimin madhështor të Ronald Reganit që kulmoi me fjalën: Zoti Gorbaçov, rrëzojeni këtë mur!” në qershorin e vitit 1987.
Ky rekord historik, kontraston shumë me atë të presidentit aktual Donald Trump. Ky president po turpëron jo vetëm vendin e tij, por historinë e SHBA-së dhe rekordin e saj si një fanar i lirisë dhe demokracisë. Gjatë fushatës të tij presidenciale në vitin 2016, Donald Trump tha: “Rusi, shpresoj të jesh në gjendje të gjesh 30.000 e-mailet që mungojnë.”
Me këtë fjali, Trump nuk po ftonte thjesht një autokraci armiqësore, që të sabotonte demokracinë amerikane. Siç e dimë tanimë, ai po çonte Shtetet e Bashkuara në anën e “djemve të këqij”. Që nga zgjedhja e Trumpit si president, shenjat se vendi është bërë një aktor negativ, po shumëfishohen çdo ditë.
Në samitin e G20-ës në Osaka, Trump u argalis me diktatorët e pamëshirshëm dhe të korruptuar, nga Vladimir Putin i Rusisë, tek Muhamed Bin Salman i Arabisë Saudite që akuzohet për vrasje, teksa ka kritikuar aleatët perëndimorë. Pas takimit, ai nxitoi për në Zonën e Demilitarizuar në Gadishullin Korean, për t’ju përulur me respekt një tirani gjakatar.
Kjo e fundit ishte edhe më e habitshme, teksa Donald Trumpi nuk e di në thelb se çfarë është përulësia. Dhe sikur të mos mjaftonin këto, Donald Trump e “do” Korenë e Veriut për një arsye shumë të veçantë. Njerëzit atje, duhet aktualisht të durojnë të tretin e dinastisë Kim, që sundon brutalisht vendin e tyre. Por Trump, e ka një risi në modelin e tij të autokracisë.
Ndërsa në këto vende, janë djemtë ata që zëvendësojnë udhëheqësit e vjetër, Trump duket se po sponsorizon ngjitjen në pushtet të vajzës së tij Ivanka. Kjo ishte mëse e qartë gjatë samitit të fundit të G20-ës në Osaka, ku Ivanka nuk ishte më e ndryshme nga shpurat e tjera nepotike, në vendet pa tradita demokratike.
Ndërkohë në SHBA, Trump po i trajton pa mëshirë refugjatët që kërkojnë siguri dhe liri, duke i mbyllur nëpër kampe. Disa roje kufitare janë kapur, duke drejtuar një faqe të fshehtë në Facebook, të mbushur plot urrejtje ndaj emigrantëve, çka është pararendëse e krijimit të një skuadre vdekjeje.
Ka ende nga ata që shpresojnë që kur Trumpi të largohet nga Shtëpia e Bardhë, do të rikthehet edhe Amerika e dikurshme. Por ata thjesht po gënjejnë veten. Një pjesë e establishmentit politik po mbështet Duçen e SHBA-së nga sistemi i kontrollit dhe balancave, teksa është vënë në lëvizje një makineri propagandistike, për të lavdëruar “urtësinë” e çdo deklarate të tij.
Që një njeri të krenohet se ka ide të përbashkëta me Putinin, dhe që përndjek gazetarët kritikë, kjo flet shumë rreth prirjeve tejet jo-liberale, në mesin e një numri të madh të popullsisë amerikane. Tashmë po formohet një Aks i ri i të Keqes, dhe për habinë e shumicës së njerëzve
në mbarë botën, në qendër të tij është pikërisht Uashingtoni./ Tirana Today
