Kreu i PAA-së, Agron Duka, ka shprehur shqetësimin pas shpërthimit të tritolit në shtëpinë e Armand Dukës, duke vënë në dukje se është i rrezikuar. I ftuar në “Drejt” nga Luan Rama në RTV Ora, Duka teksa foli për ngjarjen në fjalë, u shpreh se gjuha e kryebashkiakut Erion Veliaj në audio-përgjim është e shëmtuar. Agron Duka tha se u tremb shumë kur u informua kur kishin vënë tritol në banesën e të vëllait, Armand Dukës, ndërsa kërkoi që të “ulen gjakrat”.
“Gjuha e Veliajt e shëmtuar. Ne jemi njerëz shumë të respektuar në Shijak e Durrës. Duhet të kemi një situatë të qetë nëse vazhdon konflikti. Shqipëria mund të përjashtohet nga të gjitha kompeticionet sportive. Ti thërrasin arsyes, sidomos kryeministri. Të krijohet një klimë më të qetë. U tremba shumë kur u informova që kishin vënë tritol në banesën e Armandos. Më njoftoi bashkëshortja. Familjarët e tij u frikësuan, zhurma ishte e madhe. Nuk na rezulton që autori mund të ketë bërë diçka të tillë. Nuk kemi pasur probleme familjare. Nuk besoj se njerëzit e duan më Veliajn. I janë ulur pikët. Bën si tirons. Kjo do ta mbajë atë në pushtet?”.
Në pranga për shpërthimin ka rënë shtetasi Arlen Hasanaj. 34-vjeçari akuzohet si autori i dyshuar për vendosjen e tritolit në derën e jashtme të shtëpisë së Armand Dukës. Ai ka mohuar të jetë autori, ndërkohë që avokati i tij mbrojtës, Ilia Ilia do paraqesë sot në seancë pamjet filmike ku Hasanaj ndodhet në qendrën tregtare 23 minuta para shpërthimit të tritolit.
“Shtetasi Arlen Hasanaj ka hyrë në orën 20:30 pranë ‘Megatek’-ut dhe ka dalë tek arka për të bërë pagesën në orën 21:37 minuta. Në orën 21:44 minuta ai ka dalë nga korpusi i ‘Megatek-ut. Në datën dhe orën e caktuar shtetasi në fjalë ka qenë në vend tjetër. Pamjet janë marrë edhe nga policia, por kanë siguruar vetëm pamjet e hyrjes në Megatek dhe jo të daljes, çfarë na bën të dyshojmë se janë bërë enkas”, thotë avokati.
