India është bërë shteti i parë në botë, që ka regjistruar një numër rekord të infektuarish brenda një dite. Spitalet në Indi janë duke u përballur me vështirësi, pasi ka mungesë të shtretërve dhe oksigjenit mjekësor. Sikur të mos mjaftonte kjo, një ngjarje horror është raportuar një ditë më parë nga mediat e huaja, ku mësohet se janë gjetur qindra trupa të groposur, përgjatë brigjeve të një lumi.
Policia ka nisur hetimet pas zbulimit të qindra njerëzve të varrosur në brigjet e lumit Ganges. Duke marrë shkas edhe nga situata pandemike, menjëherë janë nxitur spekulimet në mediat sociale se trupat e gjetur ishin viktima të COVID-19. “Ne jemi këtu për ti ndihmuar, që të kryeni ritet e fundit”, janë shprehur autoritetet. Trupat u ekspozuan për shkak të shirave që përfshinë zonën.
Ata ishin të mbuluar me pëlhurë e groposur në brigjet e lumit që ndodhet në Prayagraj, një qytet në shtetin Uttar Pradesh. Por ndryshe nga çfarë është aluduar, këtë tezë e ka hedhur poshtë në mënyrë kategorike zëdhënësi i qeverisë së shtetit, Navneet Sehgal. Ai ka mohuar njoftimet e medias lokale, se në dy javët e fundit ishin gjetur më shumë se 1.000 trupa njerëzish që kishin vdekur si pasojë e COVID-19.
“Vë bast që këto trupa nuk kanë asnjë lidhje me COVID-19”, tha ai. Navneet Sehgal shtoi më tej se disa fshatarë nuk i djegin të vdekurit e tyre, siç është zakon, por për shkak të një tradite hindu, në ngjarje të rëndësishme fetare, ata i hedhin trupat në lumenj ose gërmojnë varre në brigjet e tyre. K.P. Singh, një oficer i lartë policie, tha se autoritetet kishin caktuar një hapësirë për djegien e trupave të atyre që kanë vdekur nga COVID-19, dhe se policia nuk po lejonte më asnjë varrim në bregun e lumit. Ai shtoi se autoritetet shtetërore Sehgal kanë gjetur “një numër të vogël” trupash në brigjet e lumit, por pa dhënë asnjë shifër.
Vendi me mbi 1.3 miliardë banorë është goditur nga vala e tretë vdekjeprurëse e COVID-19. Kujdesi shëndetësor është mjaft i dobët, teksa po lufton për bombolat e oksigjenit dhe shtretër për pacientët me sëmundje kritike.
