Nëse nuk merren masat për distancimin social të personave, atëherë në Japoni numri i të vdekurve do të kapë shifra të frikshme.
Në një media lokale në Japoni është dhënë alarmi se nëse tolerohet me masat, numri i të vdekurve nga koronavirusi në vend mund të mbërrijë mbi 400 mijë njerëz.
Mediat lokale i janë referuar asaj që e quajnë “projeksion të Ministrisë së Shëndetësisë së Japonisë”. Një ekip i Ministrisë që studion grupe të sëmundjes, vlerësoi se raste serioze që kanë nevojë për ndërhyrje në ventilator mund të arrijnë në 850.000.
Parashikimet bazohen në hulumtime nga profesori i Universitetit Hokkaido, Hiroshi Nishiura, një ekspert i sëmundjeve infektive, që drejton punën e qeverisë vendore në këtë shpërthim të virusit.
Gjithsesi, Ministria e Shëndetësisë japoneze nuk ka konfirmuar në mënyrë zyrtare raportin në fjalë. Administrata e kryeministrit Shinzo Abe, ka shpallur gjendje të jashtëzakonshme, e ndersa apeli i hapur vlen për të gjithë qytetarët që të shmangin grumbullimet.
