Detaje të reja janë përcjellë nga blutë e Tiranës, në lidhje me shpërthimin me eksploziv që ka ndodhur gjatë orëve të natës, në rrugën “Ymer Kurti”. Eksplozivi i është vënë katit të parë të një pallati, i cili është përshtatur si dyqan, pronë e shtetases Drita Lulo.
Njoftimi i policisë:
“Më datë 20.07.2018, rreth orës 02:10, në rrugën “Ymer Kurti “, në katin e parë të një pallati, pranë qepenit të një dyqani bosh, në pronësi të shtetases D. L., ka ndodhur një shpërthim i dyshuar nga lëndë plasëse, të llojit eksplozivë, ku ka patur vetëm dëme materiale. Po punohet për identifikimin dhe kapjen e autorit/ve dhe sqarimin e mëtejshëm të rrethanave të ngjarjes”.
Emri i Drita Lulos doli në media disa javë më parë, gjatë Vettingut të vëllait të saj, gjyqtarit të Kushtetueses, Fatos Lulo.
Ai pretendoi se e motra, pikërisht Drita Lulo, i kishte dhënë borxh një shumë prej 480 mijë dollarësh. Drita Lulo rezulton të jetë një sipërmarrëse e suksesshme me profesion inxhiniere, që ka në pronësi të saj, si aksionere, plot 4 kompani të cilat lidhen me investimet në fushën e hidrocentraleve dhe marrjen me konçension të tyre.
Dosja/ Fatos Lulo, i pari “peshk” që ra në rrjetën e Vettingut
Drita Lulo, është një emër jo pak i lakuar në dosjen e gjyqtarit të shkarkuar tashmë të Kushtetueses, Fatos Lulo.
Fatos Lulo ishte i pari “peshk” që ra në rrjetën e Komisionit të Pavarur të Kualifikimit për Vettingun, pasi nuk justifikoi dot pasurinë. KPK vendosi ta shkarkojë menjëherë pas seancës së parë dëgjimore. Në historinë e vetëdeklarimit, Lulo ka përfshirë edhe të motrën Drita Lulo, së cilës ai pretendoi se, në vitin 2005, kur ishte ende avokat, i ktheu një shumë të marrë borxh prej 480 mijë dollarësh. Pra e motra i kishte dhënë hua të vëllait gjyqtar, 480 mijë dollarë.
Vetëm 3 vjet më vonë, në vitin 2008, Drita i dhuron sërish 100 mijë dollarë të vëllait, e në vitin 2009, plot 200 mijë (një zyrë prej 172 metrash katrorë në Tiranë).
Po kush është Drita Lulo, kjo grua që ka dhuruar një pasuri të tërë për vëllain?
Drita Lulo, me profesion inxhiniere ka në pronësi të saj, si aksionere, plot 4 kompani të cilat lidhen me investimet në fushën e hidrocentraleve dhe marrjen me konçension të tyre.
