Maqedoni po shikon të gjitha mundësitë se si mund të bëhet një shtet i rëndësishëm në rajon. Ajo po përpiqet që të shfrytëzojë pozitën e saj gjeografike duke dashur të bëhet një korridor dhe udhëkryq rrugësh që lidh vendet e rajonit por dhe më gjerë. Pas marrëveshjeve të shumta më Bullgarinë, Kosovën dhe vendet e tjera në rajon, së fundmi po kërkon që të bashkëpunojë edhe me Shqipërinë. Qeveria e Maqedonisë kërkon mbështetjen e BE-së për realizimin e projektit të ndërtimit të linjës hekurudhore që do të lidhë Kërçovën me Shqipërinë, e që është pjesë e korridorit 8. Hekurudha do të jetë e gjatë 63 kilometra, ndërsa do të kalojë nga Kërçova, Debërca dhe Struga deri në kufirin me Shqipërinë. Pjesa e hekurudhës në territorin e Shqipërisë ka përfunduar. Gjatë prezantimi të sotëm të këtij projekti në selinë e delegacionit të BE-së në Shkup, ku u prezantua dokumentacioni projektues, të përgatitur me 7,7 milionë euro nga BE-ja, u tha se në periudhën e ardhshme nga kreditorët ndërkombëtarë do të kërkohen 500 milionë euro shtesë, aq sa është vlerësuar se do të kushtojë projekti. Ambasadori i Bashkimit Evropian në Maqedoni, Samuel Zhbogar deklaroi se BE-ja i kushton rëndësi të madhe projekteve të këtilla, për arsye se ajo mundëson ndërlidhjen e vendeve dhe tregjeve evropiane.
“Është e qartë se pse BE i kushton rëndësi kaq të madhe këtij projekti. Unioni ka punuar me vite për zhvillimin e rrjeteve të transportit transeuropian. Qëllimi është që të kemi një rrjet të vetëm që integron vende, detin dhe rrjetet e transportit ajror të udhëtimit në kontinent. Për më tepër, lehtëson ambicien e lartë të BE-së për të lidhur të gjithë qytetarët e saj dhe gjithë tregjet e saja. Në mënyrë që të kompletohet ky projekt i madh ne duhet të ndërtojmë lidhjet që mungojnë dhe të heqim pengesat në infrastrukturë”, tha ambasadori Zhbogar.
Ndërkohë, ministri i Transportit dhe Lidhjeve në Maqedoni, Goran Sugarevski, tha se ndërtimi i kësaj hekurudhe dhe asaj ndaj Bullgarisë, e cila duhet të përfundojë në vitin 2025, duhet të mundësoj rrjet funksional hekurudhor në Korridorit 8. Sugareski më tej ka informuar se ndërtimi i linjës Kumanovë-Belanoc do të përfundojë deri në vitin 2019, shkruan Shenja.
“Ndërlidhja hekurudhore në lindje me Bullgarinë dhe në Perëndim me Shqipërinë, është e rëndësisë kyçe për zhvillimin sektorit hekurudhor të përgjithshëm në Republikën e Maqedonisë. Ndërtimi i hekurudhave të reja duhet të mundësoj zhvillimi të rritjes ekonomike në vendin tonë dhe integrim më të shpejtë në rajon. Duke u nisur nga këto arsye, Qeveria e Maqedonisë është e përkushtuar fuqishëm në ndërtimin e rrjetin hekurudhor në vend, përmes ndërtimit të hekurudhave të reja” tha ministri Sugareski.
