E enjte, 2 Dhjetor, 2021
11.5 C
Tirana

Tremujori, sektori bankar me ulje të lehtë të numrit të degëve dhe punonjësve

Sektori bankar e ka nisur vitin 2021 me një tjetër ulje të numrit të degëve dhe të punonjësve.

Sipas të dhënave nga Shoqata Shqiptare e Bankave, në fund të marsit numri total i degëve ka zbritur në 411, nga 413 në fund të vitit të kaluar.

Ndryshimi i numrit të degëve ka prekur vetëm tre banka të sistemit gjatë tremujorit të parë, ku Banka e Bashkuar e Shqipërisë ka raportuar tre degë më pak, Credins një degë më pak, ndërsa Banka Kombëtare Tregtare ka shtuar dy degë më shumë.

Ulja e numrit të degëve është një tendencë e nisur që nga viti 2013 dhe është ndikuar paralelisht nga nevoja për një eficiencë në rritje, në kushtet e ndikimit të krizës, por edhe nga dixhitalizimi i shpejtë i shërbimeve. Deri në vitin 2019, ulja e numrit të degëve u ndikua shumë edhe nga rënia e numrit total të bankave brenda sistemit, nga 16 në 12.

Automatizimi dhe dixhitalizimi priten të kenë një ndikim në rritje gjatë viteve në vazhdim, çka dëshmohet nga rritja e përdorimit të kartave dhe internet banking. Ndërkohë, bankat po përpiqen të automatizojnë sa më shumë edhe veprimet cash. Vitin e kaluar u vërejt një rritje e ndjeshme e numrit të bankomateve të vendosura jashtë degëve. Një pjesë e mirë e tyre, veç funksionit të tërheqjes, kanë tashmë edhe funksionin e depozitimit të parave.

Ligji i ri “Për shërbimet e pagesave” sjell gjithashtu disa risi, duke formalizuar konceptin e agjentit bankar. Në zonat ku nuk kanë një prani fizike, bankat do të mund të ofrojnë shërbime nëpërmjet palëve të treta, kryesisht institucione financiare jo banka. Praktika të tilla kanë ekzistuar prej disa vitesh, por tashmë koncepti i agjentit bankar do të jetë i përcaktuar edhe në ligj. Dixhitalizimi dhe mundësia për të vepruar përmes agjentëve pritet të kenë një ndikim në ecurinë e numrit të degëve bankare edhe gjatë viteve të ardhshme.

Gjatë tremujorit të parë të vitit u shënua edhe një rënie e lehtë e numrit të punonjësve të sektorit bankar, me 0.5% më pak krahasuar me fundin e vitit të kaluar.

Vitin e kaluar sektori bankar e pati rritur numrin e përgjithshëm të punonjësve për herë të parë që nga viti 2016. Numri i punonjësve u rrit me rreth 3% krahasuar me vitin 2019. Viti 2021 ka filluar me një rënie të lehtë, por duhet thënë se kjo tendencë është ndikuar sidomos nga Raiffeisen Bank, që në fund të tremujorit të parë raportonte rreth 53 punonjës më pak.

Sidoqoftë, Raiffiesen ngelet banka me numrin më të madh të punonjësve, 1274 ose 19.5% e totalit të sektorit bankar. Shumica e bankave të tjera vijuan rritjen e numrit të punonjësve edhe gjatë tremujorit të parë. Rritja e peshës së teknologjisë po sjell më pak nevojë për punonjës në degë, por ajo po kompensohet nga zgjerimi i stafeve të lidhura me shërbimet që mbështeten te teknologjia. Në fund të muajit mars, sektori bankar shqiptar punësonte 6,526 individë./Monitor

- Reklama -

Më shumë nga kategoria




Të fundit

Haklaj plas ‘bombën’: Noka do tentojë të pushtojë selinë e PD më 12 dhjetor

Ish-kryetari i PD-së në Tropojë, Azgan Haklaj, ka lëshuar një deklaratë të fortë teksa ka thënë se Flamur Noka po përgatit strukturat për të...

Tensionet Rusi-Ukrainë, Lavrov dhe Blinken takim ‘kokë më kokë’

Sekretari amerikan i Shtetit, Antony Blinken dhe Ministri i Jashtëm rus Sergey Lavrov, u takuan të enjten në Stokholm, Suedi, mes shqetësimeve në rritje...

Nëse “Foltorja” është demokraci, atëherë PD e meriton Berisha&Bashën

Nga: Ben Andoni Nëse në fillim njerëzit e PD-së mundoheshin të gjenin atë të veçantën dhe mënyrën sesi do të mbrohej Berisha me etiketimin “Non...

Ben Blushi dorëhiqet nga drejtimi i “Top Channel”

Ben Blushi ka dhënë dorëheqjen nga "Top Channel", media e njohur të cilën e drejtonte prej katër vitesh. Nga sot ai nuk është më...

Komiteti Teknik publikon masat e reja, çfarë do ndodhë nga 4 janari

Pas rritjes së rasteve dhe shtrirjes së madhe në mbarë botën si pasojë e variantit Omicron, Komiteti Teknik i Ekspertëve ka vendosur që të...