Zhvillimi i tregtisë së lirë në Shqipëri po privohet nga barrierat doganore. Kështu ka deklaruar sipërmarrësja nga Maqedonia, Gëzime Fejzi, e cila nënvizoi si të rëndësishme lehtësimin e procedurave doganore, që do të ndihmonte në rritjen e mëtejshme të investitorëve të huaj, që janë të interesuar për të investuar në Shqipëri.
Në një prononcim për televizionin Scan, biznesmenja tha se këto barriera duhet të “thyhen” në mënyrë që të lulëzojë biznesi në Shqipëri, ashtu si në Maqedoni:
“Biznesmenët tanë janë ballafaquar me doganën. Unë mendojë që këto barriera nëpërmjet këtyre konferencave dhe odave ekonomike duhet të thyhen, që të vazhdojë të lulëzojë biznesi si në Shqipëri ashtu edhe në Maqedoni. Të arrijmë suksesin që të bëjmë një tregti të lirë”.
Megjithatë, pavarësisht kësaj, Fejzi shprehet se të bësh biznes në Shqipëri është më e lehtë se në shtetin Maqedonas, kjo për arsye të financimit nga qeveria shqiptare me anë të granteve, siç është rasti i mbështetjes së fermerëve, gjë e cila sipas saj mungon në shtetin maqedonas.
