Besmir Hida, rreth 35 vjeç, u qëllua sot me armë zjarri në qytetin e Lushnjes. Ngjarja e rëndë ndodhi në katin e dytë të një lokali, në lagjen ‘Skënder Libohova”, teksa viktima po pinte kafe. Mësohet se kohë më parë, Hidës i kanë bërë një atentat me tritol në makinën e tij, teksa e kishte të parkuar gjatë natës.
Në atë kohë, nga shpërthimi nuk pati të lënduar, kurse gjatë dëshmisë në polici ai deklaronte se nuk kishte konflikt me askënd. Policia i lidhi dyshimet me profesionin e tij për shkak të konkurrencës. Refuar krimit të rëndë, policia ka ngritur pika të shumta kontrolli në hyrje-dalje të qytetit, në aksin rrugor Lushnjë-Tiranë, Lushnjë-Fier dhe Lushnjë-Berat.
Njoftimi i policisë:
Sot rreth orës 08:15, në një lokal në lagjen “Skënder Libohova” Lushnjë, dy persona ende të paidentifikuar, kanë qëlluar me armë zjarri automatike në drejtim të shtetasit B.H, 35 vjeç, i cili ka ndërruar jetë. Autorët janë larguar nga vendngjarja me një automjet, ku në ndjekje të tyre janë vënë shërbimet e Policisë Lushnjë.
Policia ka ngritur pika të shumta kontrolli në hyrje-dalje të qytetit, në aksin rrugor Lushnjë-Tiranë, Lushnjë-Fier dhe Lushnjë-Berat.
Për zbardhjen e ngjarjes, menjëherë është ngritur grupi hetimor nën drejtimin e Prokurorisë Lushnjë.
Një grup specialistësh nga Departamenti i Policisë Kriminale në Policinë e Shtetit është nisur për t’i ardhur në ndihmë grupit hetimor, me qëllim zbardhjen sa më shpejtë të ngjarjes.
