Siguria ushqimore vazhdon të jetë një nga problemet më të mëdha për konsumatorët. Veçanërisht në produktet e bulmetit apo mishit. Edhe pse prej disa kohësh tashmë nuk lejohet më që në dyqanet e mishit tregtarët të therin kafshët. Por, duhet t’i çojnë në thertore në mënyrë që çdo gjë të kryhet brenda standardeve. Një tregtar mishi tregon për Tirana Today se situata në dyqanet e vogla është normalizuar dhe se qytetarët nuk duhet të tremben nga mishi që shitet në këto ambiente.
“Në thertore i therin, i kontrollojnë. Pa pasur matrikull në vesh ato nuk i therin kafshët, si edhe pa pasur certifikatë shoqërimi. Kasapët janë të specializuar me licencë. Pasi e therin, mishi kullohet dhe futet në frigorifer për 24 orë. Më pas vuloset dhe na e sjellin me makinë frigoriferike, shoqëruar me certifikatë. Të cilën çdo konsumator kur vjen e blenë, mund ta shohë.”
Sipas tij problematike vazhdojnë të mbeten produktet të cilat vijnë nga jashtë. Ai fajëson Autoritetin Kombëtar të Ushqimit se nuk bën transparencë të plotë kur bllokojnë kontejnerë me mish të cilat konstatohen me prezencë “salmonella” apo janë të rrezikshme për konsumatorët.
“Atë mishin me ‘salmonellë’ e kanë bosët e mëdhenj. Këtu nëpër këto dyqanet e vogla, siç është ky dyqan nuk ka mundësi që të ketë mish jashtë standardeve. Ato që janë me ‘salmonellë’ vijnë nga Brazili dhe i porosisin ata bosët e mëdhenj. AKU thotë që u bllokua ka kilogramë mish, por nuk e thonë se kush e ka sjellë. Për mendimin tim, ata që e sjellin janë njerëzit të cilët janë të lidhur me pushtetin. Nëse do të ishim në të njëjtën situatë dhe do të vinin kontrolluesit e AKU-së këtu te dyqani im, unë që nuk kam asnjë mbështetje direkt do të më publikonin emrin, gjobitnin, merrnin mishin dhe nuk do ta kishin problem fare.”/ TIRANA TODAY
