Pas fitores së derbit, trajneri i të kuqve Skënder Gega ka folur për zgjedhjen e tij për afrimin te Partizani. Gjatë një prononcimi për SuperSport, Gega e ka cilësuar këtë si një zgjedhje zemre, ndërsa shtoi se ka pritur momentin e duhur për plotësimin e kushteve që më në fund ai të jepte kontributin edhe në pankinë për skuadrën e zemrës.
“Në fakt, periudha e gjatë që kam jetuar jashtë shtetit e bëri pak jetën sportive larg nga Shqipëria, por kam qenë gjatë gjithë kohës aktiv me moshat, akademitë, universitetet. U poqën kushtet ku dy fëmijët janë të rritur e martuar, pata hapësirën dhe shtytjen, dëshirën për t’u kthyer e kontribuar në klubin ku jam rritur, ishte sfidë me zemër dhe sfidë profesionale. Partizani në Shqipëri është klub i madh, për një periudhë të gjatë jam larguar, nuk e kam ndjekur nga afër. Por kam qenë aktiv gjatë shumë vitesh, kam pritur shansin tim, kështu funksionon te Reali, te Partizani, kudo”, theksoi Gega në fjalët e tij.
