Një aksident me pasojë vdekjen ka ndodhur sot në Malin e Tomorrit. Viktima është identifikuar si 36-vjeçari Besnik Kanani, banues në fshatin Fushë-Peshtan të Poliçanit, babai i tre fëmijëve.
Mësohet se aksidenti ka ndodhur në zonën e nxjerrjes së pllakave të gurit, ku 36-vjeçari është rrëzuar me kamionin që ishte i ngarkuar me pllaka guri. Kanani punonte prej vitesh si shofer kamioni në firmat e nxjerrjes dhe përpunimit të pllakave e gurit dekorativ në Malin e Tomorrit.
Edhe pse prej gati një vitit Ministria e Mjedisit ka revokuar të gjitha liçencat dhe ka pezulluar punën e firmave të nxjerrjes së gurit dekorativ në Malin e Tomorrit, firmat vijojnë sërish punën, pa u shqetësuar aspak dhe duke mos përfillur ligjin. Burimet për BalkanWeb mes punëtorëve të këtyre firmave konfirmojnë se, në Malin e Tomorrit puna nuk është ndërprerë asnjëherë dhe se vazhdon të nxirren pllaka guri, duke rrafshuar qafën e malit, në fshatrat: Dërvi, Novaj e Nishovë.
