Vdekja e fëmijës 3-vjeçar në qytetin bregdetar të Durrësit ka bërë që autoritetet të ngrenë një grup pune për të përcaktuar patologjinë, që shkaktoi tragjedia në familjen e Zekarel Zekës.
Prindërit kanë shkuar në spital të tronditur nga humbja e beftë e fëmijës së vetëm, që sipas familjarëve, nuk ka pasur probleme shëndetësore.
Do të jetë autopsia që do të përcaktojë shkakun e vdekjes, ndërkohë hetimet janë përqendruar në kopshtin jopublik që ndodhet në lagjen 4 të Durrësit.
Përveç grupit hetimor që ka kryer veprimet e para proceduriale dhe marrë dëshmitë nga kujdestarja e fëmijës dhe i gjithë personeli i kopshtit, në kopsht kanë shkuar edhe inspektorë të AKU-së që kanë marrë mostra nga ushqimi që ka konsumuar në drekë 3-vjeçari.
Të enjten në drekë i mituri D. Zeka ndodhej në kopsht kur gjatë ushqyerjes ka shfaqur gjendje të rënduar. Sipas mjekëve fëmija ka mbërritur në gjendje të rënduar asfiksie, pa puls e tension në qendrën shëndetësore pediatrike, që ndodhet pranë Poliklinikës së Specialiteteve në Durrës.
3-vjeçari është dërguar atje nga kujdestarja e kopshtit jopublik, si pika më e afërt për të marrë ndihmën e nevojshme mjekësore.
