15 mars 2008, një fshat përfshihet nga flakët. Gjak, predha, panik, zhurmë dhe në fund veç tym. Një tym që për pak çaste fshehu shtëpitë e shkatërruara dhe shpirtrat e vrarë.
26 të vdekur dhe 300 të plagosur. Fshati shpallet zonë e shkatërruar.
Sot, 10 vite më pas, duket se asgjë nuk ngjan me atë ditë fatale; shtëpi të reja dhe rrugë të rregulluara. Por, Gërdeci nuk e fsheh dot dhimbjen e tij.
Të gjithë e kanë një plagë në shpirt… si Zamira Durdaj.
“Fshati ka ndryshuar, shtëpitë janë më të reja, por ne nuk kemi nevojë për këtë. Ne duam paqe shpirtërore. Të gjithë kanë të njëjtën plagë. Janë të frikësuar, sa herë që bie ndonjë bubullimë, tremben”- tregon 47 vjeçarja për Tirana Today.
Ky është rrëfimi i nënës që humbi djalin, babanë dhe kunatën. Është historia e fotografisë së Gërdecit. Erisoni ishte duke luajtur me biçikletë dhe bashkë më kushëririn shkuan pranë fabrikës së demontimit të armëve, për t’i çuar bukën një të afërmes. Por, në kthim flakët e mposhtën, duke shkaktuar djegie në 65% të trupit.
Në familjen Durdaj nuk flitet për Erin, pasi secili rrëfehet tek portreti që qëndron në dhomën e pritjes. Erisoni sot do të ishte 18 vjeç dhe ndoshta në një të ardhme të munguar, President.
Ndërkohë, 1 dekadë më pas, familjet e viktimave vazhdojnë të nëpërkëmben nga institucionet.
“Kur erdhi Eri erdhi nga Italia, unë i bëra një premtim, ‘mami do të vendosë drejtësi’. Kanë kaluar 10 vjet dhe unë ende nuk kam bërë gjë. Por, nëse fajtorët nuk gjykohen, unë do të bëj vetëgjyqësi. Kam bërë një premtim para trupit të një fëmije dhe unë do të marr hak. Zotit ia fal që ma mori, por njerëzve jo,”- rrëfen Zamira për Tirana Today.
Banorët e prekur nga tragjedia ia flakën në fytyrë dy memorialët qeverisë, e cila e quajti shpërthimin aksident teknologjik. Ndërkohë në memorialin tjetër, ishte mbishkrimi “Nga Ministria e Mbrojtjes”. Kjo gjë ishte e papranueshme për banorët. Ndaj bënë vetë një memorial me emrat e të dashurve.
10 vjet më pas, Zamira nuk ka më lot, por dhimbja dhe pengjet e mundojnë si në atë 15 mars të mallkuar. Tirana Today
