Gjykata e Posaçme ka pranuar kërkesën e ish-truprojës së Saimir Tahirit, shtetasit Hekuran Markut, për gjykim të shkurtuar. Në seancën paraprake, kur dosja kaloi për gjykim, Hekuran Marku kërkoi gjykim të shkurtuar, kërkesë e cila u pranua këtë të hënë nga GJKKO.
Ai akuzohet për “trafik narkotikësh” në kuadër të grupit të strukturuar kriminal. Për shkak të gjykimit të shkurtuar nëse Marku do të dënohet, i zbritet 1/3 e dënimit.
Ja se çfarë deklaroi pak muaj më parë para trupit gjykues: “S’kam lidhje me akuzat. Nuk kam kryer asnjë veprim të tillë. Kam qenë në ruajtje fizike të ministrit Saimir Tahiri dhe rregjistrat tregojnë lëvizjet e mia dhe që s’jam marrë me drogë.
Kërkoj gjykim të shkurtuar, u ktheva nga Gjermania, ku jam I regjistruar me dokumente e pune të ligjshme, për këtë proces. Punoja si hidraulik atje dhe në Gjermani kam familjen. Nuk i jam fshehur drejtësisë shqiptare”, u shpreh Marku.
Hekuran Marku u ndalua në Gjermani pas kërkesës së Prokurorisë së Posaçme. Emri i tij doli në operacionin ndërkombëtar të koduar “Shpirti”, akuzuar si pjesëmarrës në veprimtaritë kriminale të drogës.
