Presidenti i zgjedhur i Shqipërisë, Bajram Begaj është takuar sot me paraardhësit e tij. Alfred Moisiu, Bamir Topi dhe Rexhep Meidani, mbërritën në orët e para të ditës në Pallatin e Brigadave të shoqëruar nga makinat e Gardës së Republikës. Për rreth 90 minuta, Begaj u këshillua nga paraardhësit e tij për postin që e pret pas një muaji.
Ish-presidenti Bamir Topi, në një prononcim për “Report Tv” pas takimit të mbajtur me Bajram Begaj, tha se ka premisa për një Presidencë dinjitoze në këto 5 vite, në funksion të institucionit dhe të integritetit.
“Takimi miqësor dhe kortezial. Pashë premisa për një Presidencë dinjitoze në këto 5 vite, në funksion të institucionit dhe të integritetit personal. Diskutuam për situatën në rajon, luftën në Ukrainë, nevojën për forcimin e marrëdhënieve dhe aleancave euro-atlantike”, u shpreh Bamir Topi.
Bajram Begaj u zgjodh President i Shqipërisë me 78 vota të deputetëve të Kuvendit. Ai është Presidenti i tretë i Shqipërisë, pas ish-President Alfred Moisiu dhe të ndjerit Bujar Nishani që vjen nga karriera ushtarake.
