Qeni i shtëpisë, i racës Staffordshire-Terrier me emrin “Chico”, ka vrarë nënë e bir, 52-vjeçaren Lezime K. dhe të birin e saj 27 vjeçar.
Të zotët e shtëpisë kishin tetë vite që e mbanin qenin në një banesë me katër dhoma, në Hannover, por mbrëmjen e së martës “Chico” i urtë, u bë papritur vrasës i të dyve, shkruan Bild.de.
Të martën në mbrëmje, e bija e Lezimes, po merakosej pasi nuk po lidhej dot me të ëmën dhe vëllanë, transmeton Albinfo.ch. Por në momentin që ka shkuar në shtëpi, ka parë tmerr me sy. I vëllai i saj i vdekur, i shtrirë në dysheme, ndërsa menjëherë lajmëroi shpejt policinë. Ndërkaq, 25-vjeçarja i paralajmëroi të kishin kujdes nga qeni. Policët me pajisje speciale e neutralizuan qenin dhe e futën në kafaz.
“Mbështetur në hetimet e deritashme ne mund të vijmë në përfundim se qeni ka shkaktuar vdekjen e të dyve”, – ka thënë një zëdhënës i policisë. Por mënyra se si ka ndodhur kjo, është ende e paqartë.
Qentë e racës Staffordshire Terrier konsiderohen si jashtëzakonisht të fuqishëm, luftarakë dhe të patrembur. Fqinjët e kanë dëgjuar shpeshherë këtë qen duke lehur dhe e konsideronin si agresiv. Ata mendojnë se gruaja e hendikepuar dhe i biri i saj shtatanik (me trup të pazhvilluar) ishin të mbingarkuar me përkujdesjen për qenin.
Para dy vitesh një inspektor për mbrojtjen e kafshëve i kishte vizituar, pasi ishte njoftuar se qeni qëndronte në ballkon dhe nuk dilte pothuaj fare.
Prokuroria ka urdhëruar bërjen e autopsisë të dy viktimave për të gjetur shkaktarin e vdekjes së tyre.
Autoritetet pastaj do të vendosin nëse do të mbytet qeni ose jo. Deri atëherë ai do të mbahet në një strehimore kafshësh.
