Gjykata e Apelit në Shkodër ka dënuar me 3 vite burg ish-kryebashkiakun e Lezhës, Fran Frrokaj. Ish-kryebashkiaku Frrokaj akuzohet për “shpërdorim detyre” dhe “tjetërsim prone”.
Fran Frrokaj dhe 15 ish-zyrtarë të tjerë të Bashkisë së Lezhës, akuzohen se kanë bërë tjetërsimin e 234 mijë metrave tokë në bregdetin e Ranës së Hedhun në Shëngjin.
Hetimet për tjetërsimin e pronave në zonën e Ranës së Hedhun në Shëngjin kanë nisur në vitin 2017-të, kur në Prokurori u denoncua tjetërsimi i i 234 mijë e 548 metër katrorë tokë shtetërore ranishte. Fillimisht në këtë çështje së bashku me kryebashkiakun u arrestuan edhe 22 persona të tjerë, por në Gjykatën e Shkallës së Parë Lezhë dosja u dërgua për 18 persona, nga të cilët vetëm 1 u shpall i pafajshëm.
Fran Frrokaj ishte i vetmi ish-zyrtar i pandehur gjatë dhënies së vendimit, por ai u largua nga salla pa u arrestuar, pasi nuk kishte dalë ende urdhri i prokurorit.
Vendimi i gjykatës pritet t’i dërgohet policisë për ekzekutimin e vendimeve dhe prangosjen e personave të dënuar.
Për tjetërsim pronash në bregdet, ish-kryebashkiaku i Lezhës Fran Frrokaj dhe ish-kryetari i Qarkut Gjok Ndoka janë marrë të pandehur dhe nga SPAK, pas një hetimi të nisur në vitin 2019.
