Një tjetër lojtar ka rezultuar me koronavirus, duke munguar kësisoj në ndeshjen me Poloninë. Klaus Gjasula do t’i mungojë Kombëtares shqiptare në sfidën vendimtare ndaj Polonisë, që luhet këtë të martë në stadiumin “Air Albania” të Tiranës.
Mesfushori Klaus Gjasula nuk do të jetë në dispozicion të skuadrës, pasi rezultoi pozitiv me Covid-19. Futbollisti kuqezi ka pasur simptoma, dhe ka bërë menjëherë testin me tampon, ku më pas ka rezultuar pozitiv.
“Në këto kushte, në bazë të protokollit sanitar i gjithë ekipi dhe stafi teknik kanë kryer sërish testin me tampon, dhe të gjithë kanë rezultuar negativ”, njofton Departamenti i Komunikimit në FSHF.
Klaus Gjasula bëhet mungesa e pestë e kuqezinjve në ndeshjen shumë të rëndësishme ndaj Polonisë, e vlefshme për eliminatoret e Botërorit “Katar 2022”. Përveç mesfushorit, trajnerit Reja do t’i mungojnë edhe Bekim Balaj e Berat Gjimshiti të dëmtuar, Endi Çekiçi i skualifikuar dhe Sokol Cikalleshi, i cili gjithashtu ka rezultuar pozitiv me Covid-19 në testet e një dite më parë.
