Ishte një ndeshje ku të dy skuadrat do të kërkonin tre pikët e para dhe duket se fati ishte me Kukësin. Një super Reginaldo “fundosi” Tiranën e Ze Marias dhe i dha tre pikët e para Cungut në kampionat. Verilindorët kanë mposhtur kryeqytetasit me rezultatin 3-1 në ndeshjen e cila u luajt në “Loro Boriçi”, ndërkohë që Tirana renditet tashmë e parafundit me vetëm një pikë dhe lë pas vetëm Luftëtarin.
Mjaftuan vetëm dy minuta lojë dhe pas një kundërsulmi fantastik, ishte sulmuesi mozambikas Reginaldo që dërgoi topin në rrjetë. Kur u duk se Tirana fitoi terren dhe mund të barazonte rezultatin, një krosim në zonë nga Zguro në minutat e fundit të pjesës së parë gjeti Reginaldon i cili shënoi edhe golin e dytë personal duke dyfishuar shifrat.
Në fillimin e pjesës së dytë trajneri i kryeqytetasve Ze Maria bëri 3 zëvendësime të menjëhershme duke aktivizuar edhe të riun Muçi i cili në minutën e 61-të u gjend në vendin dhe në kohën e duhur për të realizuar golin e parë të Tiranës. Shpresa që bardheblutë të dilnin me pikë nga ky takim zgjati vetëm 3’ minuta, pasi Reginaldo në të 64-ën me një goditje të saktë nga brenda zonës vulosi suksesin e Kukësit që mori fitoren e parë në këtë sezon dhe u ngjit në kuotën e 4 pikëve.
Me këtë gol ritmi i lojës ra dhe Kukësi ia del deri në fund që ta mbrojë rezultatin dhe të sigurojë tre pikët në këtë përballje me Tiranën që pëson kështu humbjen e dytë në tre takimet e para në rikthimin e saj në Superligë.
Ndërsa nuk ka munguar edhe tensioni në shkallët e stadiumit, por këtë herë mes së njëjtës tifozëri. Në fundin e pjesës së parë grupi “Fanatics” filluan të shanin në kor presidentin e skuadrës, Refik Halilin, por duket se nuk kanë qenë të gjithë i këtij mendimi dhe ka filluar një përleshje mes tyre. Situata është qetësuar menjëherë pas ndërhyrjes së policisë.
