Tirana ka mbyllur në mënyrën më të mirë këtë sezon në Kategorinë e Parë, pasi është shpallur kampion i këtij niveli, duke siguruar edhe rikthimin në Superiore. Bardheblutë mposhtën në finalen e ‘Elbasan Arenës’ 2-0 Kastriotin, duke ngritur trofeun dhe duke gëzuar dyfish në përfundim të këtij sezoni.
Pas një pjese të parë të dobët nga djemtë e Ze Marias, në të dytën kthehen më të etur dhe të vendosur që të mbyllin ndeshjen. Në minutën e 63’ sulmuesi kryesor i Tiranës, Bedri Greca gjen rrugën e rrjetës dhe zhbllokon rezultatin, pas një hutimi të mbrojtjes së Kastriotit.
Pothuajse e njëjta situatë është edhe 10’ minuta më vonë ku pas një harkimi nga e djathta topi gjen Grecën të vetëm në zonë dhe e dërgon në rrjetë për të vendosur qetësinë. Më pas Tirana administron rezultatin.
Pas përfundimit të ndeshjes bardhebluve u organizua ceremonia e dorzimit të kupës, por kapiteni Karabeci sapo e ka marrë trofeun në dorë ia ka dorëzuar një personi të stafit duke mos preferuar të festojë. Më pas të gjithë lojtarët nuk kanë pranuar të flasin për mediat dhe janë futur në dhomat e zhveshjes në “Elbasan Arena”. Me këtë titull kampion, Tirana i jep fund makthit një vjeçar të pjesëmarrjes në Kategorinë e Parë, pasi që nga Gushti i këtij viti do të rikthehet në Kategorinë Superiore.
