Tirana do të ketë sheshin e saj sajin qendror më 10 qershor, në orën 19:30, kur pritet të bëhet edhe inaugurimi i tij nga kryebashkiaku Erion Veliaj. “Tirana Today” bëri një vizitë në sheshin qendror i cili po shkon drejt përfundimit të tij, duke sjellë edhe imazhet e punimeve të fundit që po kryhen mbi të.
Sheshi është menduar t’i shërbejë tërësisht këmbësorëve. Gurët dhe bimësia simbolizojnë të gjitha krahinat shqiptare, brenda dhe jashtë vendit.
“Sheshi Skënderbej”, do të ketë një shtrirje të atillë sipërfaqësore që do të përfshijë brenda edhe pjesë të Unazës së Vogël. Për të evituar ngarkesat në jetën e përditshme të qytetarëve të Tiranës është menduar dhe planifikuar një ndarje e sipërfaqes të projektit në 11 lulishte të vogla të ndryshme. Në secilën nga këto lulishte do të punohet në mënyrë të pavarur, në mënyrë që me realizimin e secilës prej tyre qytetarët të kenë akses përdorimi.
Elementët kryesor të sheshit janë gjelbërimi, gurët natyralë, shatërvanët dhe ndriçimi i godinave rreth e qark sheshit. Gurët natyralë janë në formën e pllakave të gurit, me një trashësi 10-12 cm, që janë marrë nga të gjitha trojet e Shqipërisë, duke nisur nga Tropoja dhe Kukësi, Bilishti, Librazhdi, gëlqerorët e Tiranës, Korçës, Gjirokastrës, Sarandës, Berati, Vlorës, Krujës, Bulqizës, Prizrenit, Ersekës, Skraparit etj.
Sa i përket gjelbërimit, në qendrën e Tiranës janë sjellë varietete drurësh dhe bimësh nga e gjithë Shqipëria. Sipërfaqet e gjelbra do të mbillen me 900 pemë të larta dekorative, 520 drurë frutorë, 954 shkurre të larta dekorative, 4400 shkurre të ulëta dhe 35 mijë rrënjë lulesh.
Duke shfrytëzuar ujin e shiut në sistemin e vaditjeve dhe shatërvanëve, do të ketë rreth 2100 m3 rezervuare. Ndriçimi i godinave publike që rrethojnë këtë shesh do të bëhet me sistem panelesh diellore dhe me ndriçues të lehtë. Në punimin e sheshit të ri janë angazhuar rreth 950 punëtorë dhe specialistë të ndryshëm.
