Kur po afrohen orët për të bërë publike listat e kandidatëve për deputetë për zgjedhjet e 25 qershorit dhe regjistrimi në Komisionin Qendror të Zgjedhjeve, Partia Demokratike nuk di se ç’do të bëjë me kritikët brenda saj.
Figura të tilla politike të selisë blu si Jozefina Topalli, Eduard Selami, Majlinda Bregu dhe Astrit Patozi mund të mbeten jashtë listave të kandidatëve për deputetë, nisur nga qëndrimet e tyre kundër aksionit politik të kreut të kësaj force politike, Lulzim Basha.
Duke iu referuar kësaj situate, “Tirana Today”, zhvilloi një bisedë me deputetin demokrat, Luçiano Boçi. Ai thekson se nisur nga konsultimet e ditës së djeshme me koordinatorët ende nuk dihet se ç’do të bëjë Basha me Topallin, Selamin, Bregun, Astrit Patozi.
Nisur nga kërkesa e krerëve të partive të vogla për të garuar nën siglën e PD-së në këto zgjedhje, shanset janë të mëdha që zërat kritikë ndaj Bashës të lihen jashtë garës për zgjedhjet e përgjithshme të 25 qershorit.
Po flitet nga PD dhe PS për një koalicion të mundshëm paszgjedhor midis dy partive. A ka një marrëveshje paraprake lidhur me koalicionin?
Më shumë është një tentativë, një hamendësim mediatik kjo çështja e marrëveshjes, se sa një mundësi reale. Ne tashmë jemi në një garë të shpallur dhe parashikimet më të sakta dhe të plota duhet të sillen rreth kësaj gare. Gjërat post gjithmonë janë intriguese, por larg së vërtetës.
A mendoni se Basha do të kandidojë zërat e tij kritikë, Bregu, Topalli, Selami dhe Patozi ?
Të gjithë jemi në këtë pikëpyetje!
A do garojnë nën siglën e PD-së partitë e vogla?
Pjesa dominante e ka konfirmuar tashmë.
Si e cilësoni deklaratën e kryeministrit Rama mbi dënimin me gjobë nga Gjykata e Lartë ndaj deputetit z. Paloka: “Një lajm i mirë ndëshkimi i radhës nga Gjykata e Lartë për shpifësin profesionist të PD-së, Por s’kemi parë gjë akoma, po vjen Vettingu” A mendoni se Vettingu do përdoret si armë kundër kundërshtarëve politikë ?
Siç duket Rama ka në konsideratë veten si “peshk i madh” që është, kur e ribën ketë deklaratë. Rama është i kapluar nga një ndjenjë hakmarrje personale që nuk e tejkaloi dhe gjatë kohës më “të artë” njerëzore, të qenit Kryeministër. Ai vazhdimisht e ka kërkuar dhe investuar një frymë të tillë. Sigurisht nuk mund ta lejojmë.
Intervistoi: Orest Çipa
