Drejtori i Radio dhe Televizionit Shqiptar Thoma Gëllçi e pranon hapur faktin që këtë institucion e ka pushtuar korrupsioni dhe nepotizmi. Kjo ka sjellë sipas tij edhe humbjen e besimit nga ana e opinionit publik kundrejt RTSH-së dhe për pasojë edhe rritjen e përdorimit politik të tij.
“Korrupsioni në RTVSH ka qenë shitje dhe vdekje e personalitetit profesionist dhe në shërbim të politikës. Kjo ka sjellë edhe humbjen e besimit të publikut dhe këtë rënie të ndjekësve të tij. Kjo sepse këta të fundit kanë parë te RTSH-ja një instrument propagandistik në shërbim të qeverive të radhës. Kjo ka bëre që personeli të vihej në shërbim të qeverive të radhës në gjithë këto vite me qëllim ruajtjen e pozicioneve dhe favoreve në këtë institucion që mbahet me paratë e taksapaguesve shqiptarë. Nuk di ndonjë punonjës në RTSH që të mos ketë hyrë me mik apo me rekomandime nga politike”, u shpreh Gëllçi.
Këtë konstatim, ai e ka bërë në forumin me temë: “Të ndajmë vizionin e transformimit të RTSH-së dhe të marrim reagime nga komunitetet lokale”, i zhvilluar në qytetin e Shkodrës, ku e pranishme ishte edhe kryetarja e Departamentit të Demokratizimit të OSBE-së në Shqipëri, Claudia Vollmer.
(TIRANA TODAY)
