Vijojnë të dalin në dritë fakte të reja në lidhje me lobimin e Partisë Demokratike në Shtetet e Bashkuara të Amerikës dhe lidhjen me rusët. Mediat shkruajnë se njëri nga biznesmenët që pagoi 675 mijë dollarë për PD-në, ka një të shkuar të lidhur me shërbimin sekret rus KKG.
Bëhet fjalë për Evgeni Sheremetjev, ky është njëri prej emrave që investigimi i “Mother Jones” ka lidhur me Lulzim Bashën. Ndërkohë në Shqipëri ky lajm ka krijuar një debat të gjerë publik dhe mediatik. Partia Demokratike ka deklaruar se ky është një shkrim i paguar nga Edi Rama për të shmangur vëmendjen e kapjes së kokainës në Durrës.
Kreu i PD-së ka sqaruar se partia e tij ka bërë publike të gjithë kontratat e lobimin, ndërsa shkrimin e ka quajtur një sulm ndaj Partisë Demokratike. Biznesmeni rus është bashkëthemelues i “Biniatta Trade”, kompanisë fantazmë që pagoi 675 mijë dollarë për llogari të Partisë Demokratike, në prag të zgjedhjeve të 25 qershorit.
Megjithatë, përpara se t’i futej me sukses rrugës së biznesit, duke siguruar edhe disa tendera nga qeveria ruse, Sheremetjev ka një të shkuar të errët. Arkivat sovjetike, si dhe ky artikull bashkëngjitur, tregojnë se në vitin 1988, pak përpara se të rrëzohej regjimi, ai ishte një funksionar i lartë i KGB-së.
Madje, një artikull i publikuar në mediat izraelite, tregon se Sheremetjev ishte një negociator i suksesshëm, në rastin e një pengmarrje që ndodhi në të njëjtin vit, duke siguruar lirimin e disa shtetasve hebrenj.
Në të njëjtën kohë, edhe presidenti i Rusisë, Vladimir Putin, shërbente si një agjent i KGB-së në Berlinin e Lindjes dhe duket se marrëdhënia midis dy personave është vendosur që në atë kohë.
Pothuajse 30 vjet më pas, Sheremetjev, i lindur në qytetin e Stravropolit, ka një aktivitet të suksesshëm biznesi, që përfshin një zyrë shërbimesh ligjore dhe disa aktivitete të tjera fitimprurëse. Megjithatë, nuk dihet arsyeja përse ai, me dëshirë, pagoi një pjesë të faturës së një milionë dollarëve, të përdorur për të influencuar rezultatin e zgjedhjeve në Shqipëri.
