Gazetari Trashgim Sokolaj ka deklaruar mbrëmjen e sotme në “Ora News” se prokurori Arjan Ndoj ka arrestuar persona që kanë dalë të pafajshëm. Ai tha se Ndoj është një prokuror që ndryshe nga kolegët e tij, ka dalë nga korniza që duhet të qëndrojë një prokuror.
Pjesë nga biseda në studio
Sokolaj: Prokurori Arjan Ndoj ka pasur ulje-ngritjet e tij në detyrë, në raportet e tij me detyrën dhe sistemin e drejtësisë. Është një prokuror që është larguar nga detyra për problemet me dosjet që kishte hetuar për problemet me pasurinë.
Është një prokuror që ka bërë një betejë disa vjeçare me ish-eprorin e tij, Theodhori Sollakun. Dhe më pas është emëruar në detyrë nga Ina Rama në janar 2008. Është një prokuror që në informacionin që kam, në ndryshim nga kolegët e tij është dalluar për dalje të herëpashershme nga korniza që duhet të qëndrojë një prokuror.
Është një prokuror që ka luajtur rolin e interlokutorit deri në deputetë, apo me pushtetarë të ndryshëm. Lëre më pastaj për biznesmenë në rastin e Durrësit. Ajo që është problematike në këtë rast është kontakti i këtij prokurori me një person të skeduar për vepra penale. Aq më tepër vepra që futën në kategorinë e krimeve të rënda.
Për shkak të këtij begraundi që Ndoj ka, qeveria ka vendosur të lëshojë të gjithë arsenalin që ka. Mos harrojmë që pretendimi i kryeministrit dhe zv/kryeministrit ka qenë që hetimi që zotëria ka filluar për Kadastrën e Durrësit, ka qenë pa kallëzim. Dhe ka qenë një hetim me kallëzim jo të rremë, por anonim. Zotëria ka shkruar në dosje që hetimin e ka nisur me informacione të ardhura nga drejtoria e policisë Durrës, me datën 21 shtator. Unë e kam parë atë dosje, dhe nuk ka një emër personi që bën kallëzim në lidhje për konfliktin e tre parcelave të pronësisë që zotëria po hetonte.
Abilekaj: Problemi është çfarë e shqetëson qeverinë këtu?
Sokolaj: Në këtë rast, Rama po thotë një gjysmë të vërtetë. Që pas fillimit të zbatimit të Reformës në Drejtësi, niveli i korrupsionit të gjyqtarëve dhe prokurorëve është trefishuar.
Ky ndoshta është efekti që ai zotëria aty kryeministri nuk e ka ditur, ndërkohë ju shet çdo ditë shqiptarëve me reformën. Ai është në atë pozicion që duhet ti dijë gjërat.
A ju ka rënë në sy fakti që gjatë vitit të fundit janë liruar nga burgjet elementë të krimit të organizuar, personazhe të njohur të viteve 90?! Pra kemi prokurorë dhe gjyqtarë që janë koshientë që nuk e kalojnë Vettingun. Dhe që marrin shuma deri në 200 mijë euro, për të liruar këta njerëz nga burgjet, duke shfrytëzuar hapësirat ligjore.
Abilekaj: Pse ka folur kryeministri ndonjë fjalë për këta?
Sokolaj: Nuk e di, por problemi është që ai po thotë një gjysmë të vërtetë.
Abilekaj: Kryeministri që po masakron një njeri vetëm se hapi një çështje ndaj një zyrtari, ka folur ndonjë fjalë për lirimin e këtyre që po thoni juve?
Sokolaj: Unë di raste konkrete që Arjan Ndoj ka arrestuar persona që kanë dalë të pafajshëm.
Abilekaj: Pra ti po justifikon sulmin e kryeministrit?
Sokolaj: Jo, nuk po justifikoj sulmin e kryeministrit. Por unë dua të them të vërtetën.
Kryeprokurorja e Përgjithshme, Arta Marku, prej ditës së djeshme ka nisur verifikimin e fakteve të bëra publike për rastin e prokurorit, Arjan Ndoj. Prokuroria thotë se verifikimet konsistojnë në mbledhjen e të dhënave për shkeljen e rregullave të papajtueshmërisë, me funksionin e magjistratit, parashikuar në nenin 103 shkronja“a” të ligjit 96/2016 “Për statusin e gjyqtarëve dhe prokurorëve në Republikën e Shqipërisë”.
Prokurori Arjan Ndoja, shoferi i tij, ish-polici i Krujës Andi Maloku dhe një person i akuzuar për një sërë ngjarjesh kriminale, Landi Muharremi (Aleksandër Laho), ngelën të plagosur, pasi ndaj tyre u qëlluan mbi 20 plumba.
