Temperaturat e larta dhe thatësira kanë përfshirë vendin. Kjo ka ndikuar drejtpërdrejt në sistemin energjetik, i cili bazohet tërësisht në burimet hidrike. KESH raportoi se prodhimi vendas i energjisë u ul me 26.3 për qind në gjysmën e parë të vitit.
Sipas të dhënave të KESH për periudhën janar-qershor të këtij viti, kaskada e Drinit prodhoi vetëm 2050 giga vat energji nga 2784 giga vat që u prodhua në gjysmën e parë të vitit të kaluar.
Basenet e hidrocentraleve ushqehen me prurjet e ujit, dhe mungesa e reshjeve i ka përgjysmuar ato. Sipas të dhënave zyrtare në gjysmën e parë të vitit prurjet mesatare të ujit në liqenin ishin vetëm 146 metër kub në sekondë nga 306 metër kub në sekondë që ishin janar qershorin e 2016-ës.
Ndërkohë që nga muaji i kaluar Shqipëria është duke importuar energji në sasi të mëdha për të përballuar konsumin vendas. KESH aktualisht prodhon vetëm duke shfrytëzuar prurjet natyrale të kaskadës për të ruajtur kuotat e ujit në basene, të cilat kanë zbritur në nivele minimale.
Konkretisht niveli i ujit në liqenin e Fierzës është 270.7 metër ose 20.3 metër më i ulët se sa një vit më parë. Kjo përbën një deficit prej 800 giga vatësh në rezervën energjetike të vendit.
Muajt në vijim pritet të jenë jo më pozitivë, sipas parashikimeve prodhimi vendas do të bjerë edhe më shumë. Importet e larta të energjisë do të vazhdojnë të paktën edhe për dy muajt e ardhshëm dhe ka shumë mundësi që kjo të ndikojë jo pak financat e KESH dhe OSHE, por dhe gjithë sistemit energjetik.
