Përgjatë një konference për mediat, kryeministri i Kosovës Albin Kurti komentoi zhvillimet e sotme politike në vend, teksa theksoi se Presidenti Hashim Thaçi doli në ilegalitet.
Kujtojmë se pak më herët, Thaçi mblodhi krerët e partive politike për të diskutuar formimin e një qeverie të re.
Ndërkohë, lidhur me këtë, Kurti bëri paralajmërimin e fortë se “formalizimi i deklarimeve të sotme do të përfundojë në Gjykatën Kushtetuese”:
“Presidenti sot doli në ilegalitet. Formalizimi i deklarimeve të sotme do të përfundojë në Gjykatën Kushtetuese. Presidentit këtë mundësi ia dhanë krerët e LDK-së, të cilët paraprakisht me vullnet braktisën çdo fjalë të thënë e dhënë ndaj qytetarëve e ndaj nesh.
Me këso veprime e taktikash shpaloset përpjekja për të blerë ilegalisht kohën të cilën ua shkurtoi vullneti i qytetarëve.
Presidenti i Kosovës thirret në disa dispozita të Gjykatës Kushtetuese, por veprimet e tij janë në kundërshtim me nenet e Kushtetutës, ai u referohet disa aktgjykimeve të Gjykatës Kushtetuese, por, me këtë tregojnë se ai dhe stafi i tij nuk i kanë lexuar të njëjtat, apo mbase edhe nuk i kanë kuptuar, ku i dihet”.
