Presidenti i Kosovës, Hashim Thaçi, në intervistën që dha në emisionin “Opinion”, tha se akuzat e ish-kryeministrit Berisha janë qesharake, duke shpërthyer në një sërë etiketimesh ndaj tij. Në morinë e akuzave, Thaçi nuk ka nguruar që ta cilësojë Berishën edhe si një kriminel.
“Sa i takon Berishës, unë çuditem si ai nuk ka pasur guximin politik e qytetar, dhe që nuk ka guxuar ta denoncojë shkëmbimin e territoreve që kur e ka propozuar Rugova, Qosja, Daci, etj. Krimineli kthehet në vendin e krimit. Edhe Berisha ka bërë mëkate të mëdha ndaj luftës së Kosovës. Duke e nisur me favoret ndaj Millosheviçit, dhe më pas me mëkatet ndaj UÇK-së që e quante marksiste dhe terroriste.
Unë kam shkuar në zyrën e tij në 99-ën. Kur jam zgjedhur kryeministër, kemi pasur një respekt reciprok. Shpreh keqardhje për gjendjen e tij aktuale morale, që duket si një gërmadhë politike”, përfundoi Thaçi.
