Presidenti i Kosovës, Hashim Thaçi ka zhvilluar një bisedë telefonike me presidentin e Këshillit Evropian, Charles Michel.
Biseda u zhvillua në prag të Samitit të Zagrebit që mbahet sot, midis përfaqësuesve të vendeve të Ballkanit Perëndimor dhe atyre të BE-së.
Përmes kësaj telefonate, Thaçi ka kërkuar që vendet e BE-së të marrin sa më shpejt vendimin për liberalizimin e vizave me Kosovën.
Në komunikatën e Presidencës së Kosovës thuhet se Thaçi dhe Michel ranë dakord që BE-ja duhet të vazhdojë angazhimin, për perspektivën e integrimit të Ballkanit Perëndimor në familjen evropiane.
“Dy liderët u pajtuan se përkundër rrethanave të pandemisë së shkaktuar nga COVID19 sëmundja që e shkakton koronavirusi, angazhimi për forcimin e demokracisë në Kosovë dhe garantimin e punës së institucioneve të pavarura është jetik”, thuhet në komunikatë.
