Presidenti i Kosovës, Hashim Thaçi, ka treguar se si e kanë detyruar, por edhe mashtruar ndërkombëtarët për themelimin e Gjykatës Speciale në Kosovë. Themelimi i kësaj gjykata synon të hetojë të gjithë personat të cilët dyshohen se kanë kryer krime lufte në periudhën e 1998-1999.
Thaçi ka deklaruar se kanë qenë vetë ndërkombëtarët të cilët e detyruan në themelimin e Gjykatës Speciale me anë të parlamentit të Kosovës, ndërsa thekson se qëndrimi i tij është i palëkundër në lidhje me të, por e risjellë në vëmendje qëndrimit para dy vitesh. I pari i Kosovës, kishte bërë të pamundur që Gjykata Speciale të mandatohet në Kuvendin e Kosovës, por tani duket se ka ndërruar mëndje.
Thaçi ka theksuar se për post detyrimit, ndërkombëtarët ishin të vendosur se me aprovimin e kësaj gjykate, Kosova mund të përfitonte themelimin e ushtrisë, liberalizimin e vizave si dhe anëtarësimin në organet të rëndësishme siç janë INTERPOL, UNESCO apo dhe në Këshillin Evropian
Por thotë se asgjë prej këtyre gjërave nuk ndodhi.
“Realisht atë që e kam menduar në vitin 2015, e mendoj edhe sot. Gjykata Speciale është një padrejtësi historike ndaj Kosovës, edhe ndaj UÇK-së. Ndërkombëtarët na kanë detyruar, me kërcënimin se do të marrin masa tjera drastike në raport me vendin. Dua ta potencoj diçka: nuk ka gjykatë që e lëndon luftën time për Kosovën. Ka qenë detyrimi ndërkombëtar, dhe e dyta zotimi i ndërkombëtarëve se Kosova lëviz drejt ushtrisë, drejt liberalizimit të vizave, anëtarësimi në UNESCO, INTERPOL dhe anëtarësimi në Këshillin e Evropës. Asnjëri zotim i ndërkombëtarëve nuk ndodhi, edhe pse Gjykata Speciale u aprovua”– shprehet Thaçi në Klan Kosova.
Hashim Thaçi komentoi edhe nismat e organizatave të dala nga Lufta si dhe për peticionin e nënshkruar nga 15 mijë persona .
