Në një konferencë për mediat pas takimit me emisarin special të BE-së për dialogun Mirolsav Lajçak, presidenti i Kosovës Hashim Thaçi ka deklaruar se procesi i dialogut me Serbinë duhet të përfundojë me njohje reciproke. Po kështu Thaçi tha se ka njoftuar diplomatin sllovak për reformat dhe progresin e arritur në Kosovë.
“Diskutuam edhe për angazhimet që z. Lajcak do t’i ketë për çështjen e negociatave mes Kosovës dhe Serbisë. Çdo përpjekje që çon drejt normalizimit të plotë të marrëdhënieve që nënkupton paqe e stabilitetit në Ballkanin Perëndimor, është e mirëseardhur.
E konfirmova pozicionin zyrtar të shtetit të Kosovës, ky proces duhet të fillojë me liberalizimin e vizave, dhe duhet të përmbyllet me njohje reciproke në mes të Kosovës dhe Serbisë”, tha Thaçi.
Duke folur rreth takimit në Uashington, presidenti Thaçi konfirmoi pjesëmarrjen e palës kosovare në Shtëpinë e Bardhë më 27 qershor. Ai tha se besojnë në angazhimet e sinqerta të administratës amerikane, dhe se SHBA dhe BE do të kenë koordinim të suksesshëm për Kosovën.
“Ne kemi besim të plotë në SHBA. BE është vonuar në raport me procesin e liberalizimit të vizave dhe duhet të lëvizë më shpejtë. Më 27 qershor Kosova do të jetë në Shtëpinë e Bardhë dhe besojmë në angazhimet e sinqerta të administratës amerikane se në fund edhe SHBA dhe BE do të kenë koordinim të suksesshëm për Kosovën”, u shpreh Thaçi.
