Kreu i grupit parlamentar të PD-së, Enkelejd Alibeaj, shprehu pakënaqësinë ndaj gjuhës së përdorur nga ana e kryeministrit Rama, duke e cilësuar si të papranueshme.
Alibeaj kërkoi që sipas rregullores, kryeministri të sanksionohet nga kryetarja e Kuvendit. Ai u shpreh se Rama për 13 herë tha fjalën budalla, ndërsa vuri në dukje se në Kuvend ka një kod sjellje.
“Tha 13 herë fjalën budalla, i budallenjve, kopeja dhe me radhë. Ndjej keqardhje për gjendjen mendore të tij, por në Parlament ka një kod sjellje.
Në nenin 6 thuhet që duhet sanksionuar deputeti që përdor gjuhë jo parlamentare, dhe sapo ndodhi.
Duhet sanksionuar nga ju, për të vendosur seriozitetin në këtë sallë. Për historinë e budallenjve apo të hajdutëve, mund të jenë shumë të rinj që në kohën kur zotëria ishte Ministër Kulture ka një të dhënë, ikonat, që ai çoi në Gjermani dhe që s’u kthyen kurrë”, tha Alibeaj.
