Në një kohë kur burrat po largohen nga vendi në çdo mënyrë, gratë lihen pas, nga frika për jetën e tyre. Çfarë do të thotë të kthehesh në regjimin taleban, sipas raporteve të Departamentit të Shtetit.
Marrja e Afganistanit nga talebanët “e kthen” vendin 20 vite mbrapa, siç e përshkruajnë diplomatët dhe analistët e huaj. Dy dekada, në thelb të humbura, në çdo mënyrë – si për vendin ashtu edhe për qytetarët e tij, veçanërisht për gratë.
Siç shihet nga imazhet dhe videot që kanë dalë në dritë ditët e fundit, përfaqësuesit e “seksit më të dobët” janë ato që kanë mbetur pas, pasi burrat zgjedhin të largohen nga vendi me çdo mjet.
Në një kohë kur bashkësia ndërkombëtare zgjedh të shikojë larg dhe të dënojë me … dëshira, ndërsa duhet të kishte parashikuar situata, për gratë frika kthehet. Prej fillimit të korrikut, kur talebanët filluan të pushtonin provincat e para në Afganistan, filloi “makthi” për gratë që punonin. Luftëtarët talebanë sulmuan Bankën Azizi në Kandahar dhe urdhëruan nëntë punëtore të largoheshin.
Sipas rrjetit Al Jazeera, talebanët me armë në duar i përcollën punëtoret në shtëpitë e tyre dhe i urdhëruan ato të mos ktheheshin në punë. Në fakt, tre punëtore dhe menaxheri i bankës i thanë rrjetit se talebanët i kishin informuar se anëtarët meshkuj të familjes së tyre mund të zinin vendin e tyre në bankë.
Nga viti 1996 deri në vitin 2001, kur talebanët ishin në pushtet në Afganistan, gratë nuk lejoheshin të punonin, vajzat e reja nuk lejoheshin të shkonin në shkollë dhe ishte e detyrueshme që të gjitha gratë të mbanin shami. Për të dalë jashtë duhej shoqëruar me një anëtar mashkull të familjes së tyre.
Më konkretisht, sipas raporteve të Departamentit të Shtetit në 2001, tetë rregullat që zbatoheshin për gratë, të vendosura nga regjimi taleban, ishin:
- Ato duhej të mbuloheshin me rroba deri te thonjtë.
- Ato nuk lejoheshin të punonin, përveç në raste shumë specifike.
- Ato nuk lejoheshin të shkonin në shkollë.
- Ato kishin qasje të kufizuar në sistemin shëndetësor.
- Ato nuk mund të dilnin nga shtëpia e tyre pa u shoqëruar nga një anëtar mashkull i familjes së tyre.
- Kur dilnin, hipnin në autobusë specifikë, ndërsa për të hipur në taksi duhej të shoqëroheshin përsëri nga një burrë, i afërmi i tyre.
- Në përgjithësi, gratë nuk mund të ecnin në rrugë pa u shoqëruar nga një burrë, e aq më pak nga një i afërm.
- Dritaret e shtëpive të tyre duheshin lyer, në mënyrë që asnjë kalimtar të mos shihte brenda.
Në rast të shkeljes së ndonjë prej rregullave të mësipërme, gratë ndëshkoheshin me rrahje, dhe në shumë raste, me vdekje me gurë.
Burimi i lajmit: Protothema. Përshtatur nga Tirana Today
