Pas Rinasit, edhe Porti i Durrësit ka shtuar masat lidhur me monitorimin shëndetësor, kundër përhapjes se koronavirusit. Sikundër u bë me dije një ditë më parë, specialistët e Sektorit të Mbrojtjes së Shëndetit kanë në dispozicion edhe termometrat lazer për matjen e temperaturës në distancë. Përparësi gjatë kontrollit i jepet vendit të origjinës nga ku vijnë pasagjerët.
Ndonëse në vendin tonë nuk ka asnjë rast të dyshuar, institucionet po kryejnë monitorimin e të gjithë pasagjerëve dhe personelit të anijeve tregtare që hyjnë nëpërmjet kësaj pike kufitare.
Në port janë instaluar edhe pajisje të tjera të posaçme, si dhe janë hapur ambiente të veçanta për të realizuar kontrollet, me qëllim izolimin e menjëhershëm të personave të dyshuar me virusin vdekjeprurës.
Koronavirusi i përhapur në Kinë, po merr jetë njerëzish çdo ditë. Sipas ekspertëve është mësuar se ky virus mund të jetë përhapur nga një supë e gatuar me lakuriq nate, ndërsa dyshohet nga ana tjetër se infeksionin mund ta kenë përhapur edhe gjarpërinjtë, një ndër ushqimet më të preferuara për kinezët. Por, ndërkohë kanë qarkulluar disa versione ku mendohet se virusi është krijuar në një laborator ushtarak në Whan.
