“Tërmeti i 26 nëntorit ka pasur ndikim negativ edhe në rritjen ekonomike”.
Kështu ka deklaruar Guvernatori i Bankës së Shqipërisë, Gent Sejko, në një deklaratë për mediat, duke shtuar se ky ndikim negativ pritet të mbartet edhe gjatë vitit 2020.
“Tërmeti i 26 nëntorit pati një ndikim negativ në rritjen ekonomike, ky ndikim pritet të mbartet edhe gjatë 2020. Dëmtimi i ambienteve të bizneseve, rritja e pasigurisë. Procesi i rindërtimit pritet të japë një ndikim pozitiv. Por pritet të jetë i vonë në kohë dhe jo mjaftueshëm i fortë për të ndikuar efektet negative. Eksportet shqiptare do të vijojnë të përfitojnë nga sektori i turizmit. Tregjet financiare janë të qeta, kursi i këmbimit paraqitet i qëndrueshëm,” tha ai.
Në fjalën e tij, Gurvenatori Sejko shpjegoi se tejkalimi i pasojave të tërmetit pritet t’i hapë rrugë një rritje më të shpejtë të ekonomisë.
“Këto parashikime kanë një dozë të shtuar pasigurie, që lidhet me mungesën e një parashikimi të saktë mbi ndikimet e tërmetit. Këshilli Mbikëqyrës vendosi të mbajë të pandryshuar normën bazë të interesit në 1%. Këshilli Mbikëqyrës konstaton se mbeten rreziqet e kahut të poshtë”, është shprehur Sejko.
