Gjatë javës së ardhshme, forcat Policisë së Shtetit dhe Inspektoriati Kombëtar i Mbrojtjes së Territorit do të nisin operacionin “Bregdeti Ynë”, përmes të cilit, sipas tij, do të pastrohet e gjithë riviera shqiptare nga ndërtimet pa leje. Ky ishte paralajmërimi i dhënë nga ana e kryeministrit Rama.
Duke qëndruar në të njëjtën linjë, kryeministri Rama ka shtuar se krahas prishjes së ndërtimeve pa leje, do të vijohet me ndjekjen penale të atyre që kanë shkelur ligjin, përmes lejimit të ndërtimeve në zonat bregdetare.
“Ne jemi të vendosur ta bëjmë këtë punë edhe për një arsye tjetër, sepse operacioni fillon të hënën e ardhshme. Dua t’ua përcjell mesazhin të gjithë atyre që janë në kushtet e shkeljes së rëndë të ligjit, të lexojnë Kodin Penal, dhe menjëherë të marrin masa tani, se do jetë vonë deri të hënën, për t’iu shmangur përballjes.
Të lexojnë Kodin, se çfarë i pret në momentin kur konstatohet shkelja dhe kur duhet të ballafaqohen me ligjin. E dyta, unë dua t’ua bëj shumë të qartë gjithë zinxhirin që përfshihet në këto ndërtime, që nga punëtorët e thjeshtë, që me Kodin Penal janë të gjithë pjesë e fajësisë dhe përgjegjësisë. Të gjithë do të ndalohen e penalizohen. E treta dhe më e rëndësishmja është se kjo është pasuria më e madhe që Zoti i ka dhënë këtij vendi. Kjo punë ka përgjegjësi. Unë dëshiroj nga sot këtu të jap një mesazh shumë të qartë për të gjithë ata cënues të kësaj pasurie, të tërhiqen tani, për të filluar të hequr atë që kanë bërë. Në çdo lloj situate që do të jetë ndërtesa, do të shembet, madje do të ketë edhe pasoja. Kush nuk do t’i pastrojë vetë inertet, do të paguajë rëndë edhe për këtë”.
I shoqëruar nga Ministri i Brendshëm, Bledi Çuçi, dhe kreu i Kadastrës Artan Lame, Rama iu bëri thirrje të gjithë pronarëve të marrin masa brenda kësaj jave. Çuçi dhe Lame thanë se të dyja institucionet, do të bashkëpunojnë për pastrimin e bregdetit shqiptar. Kreu i Kadastrës Artan Lame, tregoi se ku do të fillohet me prishjet, duke e vendosur lapsin tek bregdeti i Ksamilit.
“Ksamili është një zonë shumë e madhe informale, që ka problematikat e veta. Një pjesë e objekteve duken të sistemuara, pavarësisht se janë të palegalizuara, por shpëtimi i sezonit dhe shfryrja e zonës nga ndërtimet pa leje duhet bërë përmes prishjeve në fashën e bregdetit.
Jam i bindur se të gjithë do të na thonë bravo, nëse e pastrojmë fashën e bregdetit, sepse kështu do t’i japim frymëmarrje sezonit. Është ndërtuar shëtitorja në Ksamil dhe ky spastrim duhet të fillonte qoftë në fashën e bregdetit, qoftë edhe në fashën e parë sipër shëtitores”, tha Lame.
