Shtatë shtetas sirianë janë ndaluar nga Policia e Dibrës, pasi tentuan të kalonin në mënyrë të paligjshme kufirin në Bllatë. Me qëllim për t’u larguar në drejtim të Maqedonisë, dhe më pas në një nga vendet e BE-së.
Mësohet se sirianët janë shoqëruar në Qendrën e Rehabilitimit në Kukës. Ndërkohë, Policia vijon hetimet për identifikimin dhe arrestimin e personit që i ka sjellë në Dibër dhe që do t’i transportonte në drejtim të kufirit me Maqedoninë, kundrejt fitimit.
“Bashkëpunimi me qytetarët parandalon një rast të kontrabandimit të klandestinëve nga vendet e Lindjes së Mesme.
Policia e Dibrës, pas informacionit të marrë nga qytetarët për disa shtetas të huaj që po tentonin të largoheshin në drejtim të Pikës së Kalimit Kufitar Bllatë, për të kaluar kufirin në mënyrë të paligjshme, ka organizuar punën duke bërë lokalizimin dhe vendndodhjen e tyre”, thuhet mes të tjerash në njoftimin e policisë.
