Policia e Shtetit njofton se ditën e sotme një 26 vjeçar ka rënë në prangat në qytetin e Himarës. Sipas njoftimit i riu ka tentuar t’i shmanget thirrjes së policisë për të ndaluar dhe në përpjekje për të shpëtuar ka hedhur dhe sasinë e lëndës narkotike të dyshuar si kanabis sativa që kishte në makinë.
Forcat e policisë janë vënë në ndjekje të tij dhe e kanë prangosur të riun nga Shkodra. Atij i janë sekuestruar një sasi e madhe parash, 13 lëndë narkotike dhe makina me të cilën lëvizte.
Njoftimi i Policisë:
Finalizohet operacioni antidrogë i koduar “Livadhi”. Sekuestrohen 13 kg kanabis, vihet në pranga 1 shtetas.
Specialistët për hetimin e narkotikëve dhe forcat operacionale të DVP Vlorë, në bashkëpunim me shërbimet e Komisariatit të Policisë Himarë, në bazë të informacioneve të marra në rrugë operative se në qytetin e Himarës po qarkullonte një automjet i dyshimtë, menjëherë kanë organizuar punën, me qëllim bllokimin e këtij mjeti.
Në tentativë për t’u larguar dhe për t’i shpëtuar shërbimeve të Policisë, drejtuesi i automjetit “Ford Fiesta” e ka hedhur nga automjeti lëndën narkotike, pranë zonës bregdetare të quajtur “Livadh”, Himarë.
Në ndjekje e sipër, shërbimet e Policisë kanë bërë kapjen e menjëhershme dhe arrestimin në flagrancë të drejtuesit të mjetit, 26-vjeçarin K. P., banues në Shkodër.
Në vijim të veprimeve procedurale, Policia ka bllokuar dhe sekuestruar në cilësinë e provave materiale:
- 13 kg cannabis sativa;
- një automjet “Ford Fiesta”;
- një sasi parash prej 2400 eurosh;
Materialet iu referuan Prokurorisë, në ngarkim të tij, për veprën penale “Prodhimi dhe shitja e narkotikëve”.
