Mediat lokale në Kinë bëjnë me dije se doktori kinez, i cili u përpoq të paralajmëronte njerëzit për koronavirusin e Wuhan, ka ndërruar jetë.
Li Wenliang shkroi në një grup chat-i, të aplikacionit “WeChat” se 7 pacientë ishin diagnostikuar me një sëmundje të ngjashme me virusin SARS.
Në mesazhet e dërguara më 30 dhjetor të vitit të shkuar, doktori theksonte se sipas testeve që kishte bërë, bëhej fjalë për koronavirusin (familje e madhe e viruseve, ku përfshihet edhe virusi SARS).
“Unë vetëm doja nga kolegët që të tregoheshin të kujdesshëm”, tha ai.
34-vjeçari u kishte thënë miqve që t’i paralajmërojnë të afërmit e tyre në mënyrë private. Por në vetëm pak orë mesazhet e tij ishin publikuar dhe shpërndarë gjerësisht.
“Kur i pashë mesazhet duke qarkulluar në internet, kuptova se kishin dalë nga kontrolli dhe ndoshta do të ndëshkohesha”, tha ai.
Mjeku u akuzua nga policia lokale për përhapje të informacioneve të rreme vetëm disa orë pas shpërndarjes së mesazheve. Ai e kuptoi vetëm të shtunën e kaluar se ishte prekur edhe vetë nga koronavirusi.
