Një person është plagosur nga ushtarët e Maqedonisë së Veriut, pasi tentoi të hyjë në bazën kryesore ushtarake të vendit.
Sipas Ministrisë së Mbrojtjes, rojet ushtarake qëlluan dy herë në ajër dhe më pas e plagosën në këmbë për ta mbajtur jashtë gardhit që rrethon zonën ushtarake.
“Personi edhe më tej nuk i ka dëgjuar paralajmërimet, me ç’rast me njërin plumb është qëlluar në thembrën e këmbës së djathtë. Konform procedurave i është dhënë ndihma e parë dhe është transportuar në spital. Menjëherë janë njoftuar organet kompetente hetuese”, tha ministria e Mbrojtjes.
Nuk është bërë ende i ditur identiteti i të plagosurit dhe as shkaqet e kësaj ngjarjeje.
