Gjatë muajit gusht, presidenti Emmanuel Macron, pas një telefonate me kryeministrin grek Kyriakos Mitsotakis, ka shprehur shqetësimin e tij për eksplorimin e Turqisë në kufirin e ujërave greke. Ai i ka bërë thirrje Turqisë që të ndalojë kërkimet e naftës dhe gazit në ujërat e Greqisë. Edhe udhëheqësja e partisë së ekstremit të djathtë, Tubimi Kombëtar në Francë, Marine Le Pen, tha se mbështet presidentin Macron.
Le Pen tha se kërcënimet e Erdogan-it kundër Macron-it, në të vërtetë shënjestrojnë Francën. Po sipas saj, Erdogan po provokon. “Kundër këtyre kërcënimeve, unë jam vendosmërisht pas Emmanuel Macron-it, i cili është presidenti i Francës, pavarësisht nga fakti që kemi miliona mosmarrëveshje me të. Erdogan po provokon”, tha liderja e partisë së ekstremit të djathtë.
Kujtojmë këtu se Macron, në një deklaratë para Samitit të Vendeve të Evropës Jugore, Anëtare të Bashkimit Evropian (Med7), tha se Turqia po shton provokimet.
“Turqia po rrit provokimet, dhe kjo nuk i përshtatet një vendi të madh. Populli turk është popull i madh, dhe meriton gjëra të tjera. Ne evropianët duhet të jemi të hapur dhe të ashpër kundër qeverisë Erdogan, jo kundër popullit turk. Qeveria Erdoğan bën sjellje të papranueshme”.
Ndërkaq, pas kësaj deklarate, presidenti turk Erdogan u përgjigj: “Nuk dua të jap emra, por jam i detyruar, sepse ai merret shumë me personalitetin tim. Ai thotë se ‘Kemi problem me Erdogan-in dhe jo me popullin turk‘. I nderuar Macron, t’i do të kesh edhe shumë probleme me mua personalisht. Këtë ta kam thënë shumë herë personalisht, por nuk dëgjon.
Të kam thënë që ‘t’i nuk ke as njohuri për historinë‘. Ti nuk di as historinë e Francës. Fillimisht mos u merr me popullin turk, me Turqinë. Historia e Afrikës është pothuajse historia e Francës. Jeni ju ata që vratë 1 milion njerëz në Algjeri. Jeni ju që vratë 800 mijë njerëz në Ruanda. Fillimisht duhet të mësosh se ju nuk mund të na jepni mësime humanizmi. Këto unë ia kam thënë personalisht atij. ‘Shiko, t’i nuk ke njohuri për historinë. Fillimisht duhet të mësosh këto’”.
