Kryeministri Edi Rama i është përgjigjur akuzave të Ministrisë së Punëve të Jashtme të Rusisë se po nxit tensione në rajonin e Ballkanit. Votimi i gjuhës shqipe në Kuvendin e Maqedonisë është përshëndetur nga të gjithë politikanët shqiptarë si brenda Shqipërisë ashtu edhe jashtë saj, por për Rusinë kjo nuk ishte strategji e mirë.
Ministria e Punëve të Jashtme të Rusisë ditë më parë ka deklaruar se retorika e Ramës mund të nxisë tensione në rajonin e Ballkanit Perëndimor. Këtë deklaratë Rama ka komentuar, duke thënë se ndihet krenar kur dëgjon se po akuzohet në çështjen e mbrojtjes së shqiptarëve dhe interesave të tyre.
Rama tha se agjenda e Shqipërisë nuk është e fshehtë, por Shqipëria ka qenë e qartë në kërkesat e saj. Sipas tij, pavarësisht se Shqipëria është e vogël, por kjo nuk e ka penguar të kërkojë të drejtat e saj dhe të ulet në tryezë si një e barabartë mes të barabartëve
“Jam krenar kur akuzohem se mbroj interesat e shqiptarëve. Nga ana tjetër qëndrimi ynë është shumë i qartë. Nuk kemi asnjë lloj axhende të fshehtë, është publike, pozicionet tona kanë qenë pa ekuivok, edhe kur kanë krijuar temperaturë të lartë me fqinjët, sepse ne kemi qenë të vendosur t’i japim politikës së jashtme një politikë të re, dinjitetin pavarësisht nëse jemi një vend i vogël, apo një vend i varfër, se në tryezë është i barabartë mes të barabartëve”-u shpreh kyeministri Rama
Moska zyrtare reagoi pak ditë më parë pas deklaratës së Ramës në 27 vjetorin e themelimit të FRESSH, i cili u shpreh se qeveria dhe PS ishin protagoniste të miratimit të ligjit për gjuhën shqipe në Maqedoni, kjo falë përpjekjes dhe efikasitetit të politikës së jashtme të Shqipërisë. Platformën nga ana e Tiranës zyrtare, ministria ruse e ka quajtur një platformë famëkeqe dhe që nxit tensione në Ballkan.
