Pasi u thirr në SPAK për hetimet lidhur me aksin Kardhiq-Delvinë, Prokuroria e Posaçme i ka komunikuar sot akuzën për “shpërdorim detyre” ish-drejtoreshës së ARRSH-së, Sonila Qatos. Ish-drejtoresha e ARRSH-së, Sonila Qato u njoh me akuzën që është ngritur ndaj saj, asaj të “shpërdorimit të detyrës”, pas një kallëzimi të ngritur ndaj saj nga një kompani ndërtimi për pabarazi në tendera.
Kjo është hera e dytë që Qato është paraqitur në SPAK. Arsyeja e parë që Qato u thirr në SPAK lidhet me një kallëzim që ka bërë Kontrolli i Lartë i Shtetit dhe e dyta për tenderin Kardhiq-Delvine. Në janar të vitit 2020 Kontrolli i Lartë i Shtetit bëri kallëzim në Prokurori për ish-Drejtoreshën e Autoritetit Rrugor, Sonila Qato dhe 3 anëtarë të Komisionit të Vlerësimit të Ofertave. Sipas KLSH-së, ata shkelën procedurat e tenderimit për tunelin e rrugës Kardhiq-Delvinë me vlerë 19 milionë euro, i cili u anulua në gusht 2019 pasi kompania Gjoka Konstruksion ishte skualifikuar dy herë. Asokohe, ish-drejtuesja e Autoritetit Rrugor Shqiptar akuzonte median për spekulim mbi procedurat e ndjekura. Qato u dorëhoq nga detyra në shtator të vitit 2019.
