Vijojnë operacionet për të mbajtur nën kontroll situatën e zjarreve. Aktualisht janë evidentuar dy vatra zjarri, përkatësisht në Dibër dhe Vlorë.
Vatra e zjarrit në fshatin Patin, Klos të Dibrës është riaktivizuar gjatë mesditës, duke rrezikuar dy banesa të braktisura që ndodhen në zonë. Edhe pse terreni është shumë i vështirë forcat zjarrfikëse kanë ndërhyrë me mjete për të shuar flakët, ndërsa në ndihmë të zjarrfikësve kanë shkuar edhe 40 forca ushtarake ndërkohë është nisur edhe një helikopter për ndërhyrje nga ajri.
Ndërkohë, në fshatin Mavrovë të Selenicës, një zjarr ka përfshirë një sipërfaqe me shkurre dhe ullishte. Në vendngjarje kanë shkuar forcat zjarrfikëse që po punojnë për shuarjen e flakëve.
Drejtoria e Përgjithshme e Emergjencave Civile përsërit thirrjen ndaj të gjithë qytetarëve që në rast se konstatojnë zjarre, të njoftojnë menjëherë në numrat e emergjencave 112, 129 dhe 128.
