Në një kohë kur palët politike janë në konflikt për “Teatrin”, ndërmjetësi i cili do të shuaj gjakrat, në këtë rast presidenti, zgjedh sërish gjuhën diplomatike. Të njëjtën linjë ka mbajtur edhe kryetari i Bashkisë së Tiranës, Erjon Veliaj, por si me lezet, ai ka huazuar shprehjen e famshme të Metës; “Me qetësi e dashuri”.
Ai mbetet shpresëplotë se nga palët do të gjendet vullneti për një Teatër të ri. Në një kohë kur në Kuvend, klasa politike luan si macja me miun, Meta zgjedh të mos heshtë, duke konfirmuar se nuk do të ndikohet nga asnjë faktor i jashtëm.
Kreu i Shtetit, Ilir Meta, i pyetur nga gazetarët për dekretimin e ligjit të ri për Teatrin, tha se nuk do të ndikohet nga asnjë faktor jashtë përgjegjësive që ka presidenti.
“Dua t’iu siguroj që në çdo vendim, nuk do të ndikohem nga asnjë faktor jashtë atyre përgjegjësive që ka presidenti, në mbajtjen e qëndrimeve të tilla”, u përgjigj Meta.
Nga ana tjetër, Veliaj tha se tashmë ekziston një konsensus i gjerë, si nga grupet e interesit, ashtu edhe nga popullata, mbi nevojën e një godine të re moderne, që plotëson të gjitha kushtet për aktorët.
“Besoj që qetësia e dashuria do triumfojnë, për diçka që për të cilën tashmë besoj se ka konsensus publik, konsensus të gjerë publik tek aktorët, tek ata që votuan në Parlament dhe tek popullata, sepse siç e tha i madhi Robert Ndrenika, kemi nevojë për Teatër, e jo për muze.
Ndaj, për një Teatër të ri besoj do gjendet një vullnet i mirë, kam shumë besim”, u shpreh Veliaj.
Në këtë situatë kaotike, artistët vijojnë protestat e tyre kundër ndërtimit të Teatrit të ri, dhe opozita kundërshton fuqishëm ligjin e sapomiratuar në Parlament.
